Ipa drug rehab una 

Sa di’ pa ma ”clear”

TAGBILARAN CITY March 30 (PIA)—“Dili ingon niana ka sayon sa usa ka lugar nga ideklara nga wala nay hulga sa illegal nga drugas.” 

Kini maoy napalutaw nga kamatuoran didto sa labing bag-o nga tigum sa Provincial Peace and Order Council (PPOC) dihang napangutana kon unsa nay kabag-ohan sa mga kalungsuran nga buot nang madeklarar nga nalimpyo na sa drugas. 

Kahinumduman nga ang lungsod sa Dimiao una nga nga mipagawas sa ilang deklarasyon nga naluwas na sa illegal nga drugas. 

Niining bag-o pa lamang usab, gibutyag usab sa mayor sa Batuan nga nalimpyo na ang ilang lungsod sa hulga sa drugas. 

Dungan niining tanan, napagawas ang balita nga 95 na sa mga barangay sa 1,109 ka barangay sa Bohol ang nalimpyohan na sa illegal nga drugas, subay sa kasayuran nga gipaambit sa kapolisan. 

Apan, sa pagpakompirmar niini sa Kampo Dagohoy, ang base sa kapolisan sa tibuok Bohol, nagmakuli sa paghatag sa tataw nga kompirmasyon. 

Diay, gipasabut ni Gobernador Edgar Chatto nga wala magkasibo ang ang gabayan sa kapolisan ug sa Provincial Peace and Order Council (PPOC) sa pagdeklara sa usa ka lugar nga nakalingkawas na sa hulga sa illegal nga drugas. 

Gibutyag ni Gob Chatto nga sa pamaagi sa PNP, hangtud ang mga nalista nga drug personalities sa usa ka barangay mosurrender sa Oplan Tokhang o mawala na sa lugar, isipon na kini nga nalimpyo. 

Kini nga taho kinahanglang dasonan sa Barangay Anti Drug Abuse Council (BADAC) ug sutaon usab sa Municipal Anti Drug Abuse Council (MADAC), dayon iduso pa sa mga ahensya nga nagtutok alang niini. 

Natumbok ang Department of Interior and Local Government, Philippine National Police, Philippine Drug Enforcement Agency, Department of Health nga moapil sa pagsuta kon tinuod ba nga nalimpyo na ang usa ka lugar, sa dili pa ikarekomendar and drug clearance. 

Sa laing bahin, ang PPOC, miisip nga dili pa igo nga mosurrender sa Tokhang ang usa ka miangkon nga nakagamit sa illegal nga drugas. 

Gidasonan ni Gob Chatto nga isipon lamang nga cleared ng usa ka lugar kon ang mingtahan nga mga drug personalities miagi na sa Center for Drug Education and Counseling (CEDEC) aron milhan kon unsa ka lawom ang epekto sa drugas sa iyang lawas. 

Gikan sa CEDEC, ang drug personality kinahanglan pa nga mopailawom ug molahutay sa tulo ngadto sa unom ka buwan nga pagpahiuli, o makapakita na nga natapos na niini ang pagpailawom sa rehabilitasyon gikan sa usa ka accredited nga drug rehab facility, matud ni CEDEC Center Director Dr. Cesar Tomas Lopez. 

Kadtong nakagamit lamang og pipila ka higayon, kadtong dili grabe ang pagkahungog sa drugas ug kadtong medyo apektado na apan wala pa manginahanglang ipaslak sa clinical rehab, gikinahanglang makapakita sa kamatooran nga nahuman na nila ang gitumbok nga Community Based drug Rehab program without walls (CBRP-WoW) sa pagpahiuli sigo sa ilang pagka apektado sa drugas, dugang niya. 

Tungod niini, mahimong wala pay bili ang sayo nga pagdeklara sa kalungsuran nga luwas na sa drugas kon ang mga drug personalities niini wala pa magpailawom sa rehab, subay sa gipadayag ni Gob. Chatto. (rahc/PIA-7/Bohol)