Walay mosaksi, mao’ng daghang 

krimen karon nga wa masolbad

TAGBILARAN CITY, March 31 (PIA)—Walay mga saksi nga tagana mobarug alang sa kamatuoran. 

Kini maoy gitumbok nga rason sa kapolisan ngano nga daghang kaso sa krimen sa Bohol ang hangtud karon, wala pa masolbad. 

Ang kalisang nga manginlabut tungod sa posibilidad nga masumbalikan, posibleng maoy rason nganong maglisud gayud sa paghipno sa lig-ong kaso batok sa mga criminal.

Kini usab maoy unod sa gipahayag ni PSSupt Felipe Natividad, hepe sa kapolisan sa Bohol dihang napangutana nganong ubos kayo ang kadaghanon sa mga krimen nga nasolbad kon itandi sa mga wala masolbad. 

Didto sa Provincial peace and Order Council Meeting niadtong Miyerkules, Marso 29, napangutana sa representante sa Social Action Center sa Dioceses sa Tagbilaran nga si Romeo Teruel ngadto sa kapolisan kon hain man dapita ang pagkulang nganong ubos ang crime solution efficiency sa BOhol .

May mga kaso sa krimen sa Bohol nga padayon pang nagpabiling na archive ug wala masolbad tungod sa kakuwang sa ebidensya ug testimonya sa mga nakasaksi sa krimen, dugang sa kapolisan. 

Niini, matud ni PSSupt Natividad, kini tungod kay walay tawo nga migawas og mosaksi sa mga krimen bisan pag may kasayuran sila. 

Tungod usab niini, nanawagan pag-usab si Gob Edgar Chatto ngadto sa mga katawhan: “Pakita kamo, kamong mga may nasaksihan ug may ikahatag nga kasayuran, ipagawas kana. 

Usa pa, ang paggawas sa mga saksi, maoy angayan nga buhaton. 

Apan, alang sa kadaghanan, hangtud dili mobati ang katawhan nga luwas sila ug panalipdan sa balaod, daghan gayud usab ang nagdumuli sa paggawas aron mamahimong saksi. 

“Wala kitay gibasol, apan kon wala gayud kitay mga saksi nga makuha, o ang katawhan magdumili sa pagbarug sa korte, daghan gayud nga kaso nga dili masulbad,” pasabut sa hepe sa kapolisan sa Bohol. 

Niini, gipahinumdon ni Gob Edgar Chatto sa kadaghanan nga ang Department of Justice adunay nagpadayon nga programa sa pagpanalipod sa mga witnesses. 

Ug kon ugaling kuwang pa, gipahinumdom usab sa gobernador nga ang Kapitolyo nakahimo nag pipila ka mga kaso diin ang mga saksi niini napahimutang sa witness protection program ilawom sa PPOC. (rahc/PIA-7/Bohol)

Gipalanog sa kapolisan sa Bohol pinaagi ni PSSupt Felipe Natividad ang panawagan ngadto sa mga magkasayuran kabahin sa mga krimen nga nagpanghitabo sa pagbarug isip saksi aron kahatagan nag solbad ang mga kaso. (rahc/PIA-7/Bohol)