Abril 7 gideklara nga

Bohol Clean Up Day

TAGBILARAN CITY, March 31 (PIA)—Sa tumong nga mamahimo kining kick-off alang sa malungtarong pagdason sa gawi sa kalimpyo, gideklarar sa Sangguniang Panlalawigan sa Bohol ang Abril 7 karong tuiga isip Bohol Clean Up Day.

Una na nga gipalubad ni Gobernador Edgar Chatto didto sa tigum sa Provincial Peace and Order Council (PPOC) niadtong Miyerkules ang nga angayan na nga sugdan sa Bohol ang paghimong tipik na sa kinabuhi ang pagpanglimyo sa mga silinganan.

Ang Bohol nangandam usab sa pagdagsang sa top level nga mga ministro ug senior officials sa Association of SouthEast Asian Nations (ASEAN) nga maghimo sa ilang mga tigum dinhi sa Bohol atul usab sa ika 50 ka tuig nga kasumaran sa kahugpungan ning habagatang sidlakan.

Matud ni Chatto, samtang ang mga taga Bohol limpiado gayud, kasagaran kanila mangandam gayud alang sa dakung pag-abiabi sa mga bisita ilabi na sa pista.

Apan namatikdan na usab nga daghan sa Bohol ang naghuwat lamang kon may mag-una, ilabi na sa pagpanglimpyo, segun sa mga tinubdan.

Nahimo na usab nga kinaiya sa mga Bol-anon ang pagpangortina sa panahon nga magkaduol nang pista.

Alang kang Chatto, bisan pag wala nay Asean, mamahimong ipalahutay ang pagbansay sa pagpanglimpyo.

Pinaagi sa Provincial Resolution No 243 series of 20176 nga napalabang sa Marso 31, nadeklara na nga Bohol Clean Up Day ang Abril 7 Biyernes.

Niining resolusyon, giaghat na ang mga Bol-anon nga magdungan sa pagpanglimpyo sa mga silinganan ug kadalanan, agi na usab og pagpangandam alang sa ASEAN ug sa pista.

Gani, mas maayo kon mapahimutang na ang mga banderitas alang sa pista ug pag-abi-abi sa mga bisita gikan sa ASEAN.

Buot sa resolusyon nga hugpongan nag natumbok nga gimbuhaton pinaagi sa pagpanghipos usab sa mga basura, pagpanangtang sa mga caratola ug poster sa eleksyon ug mga pahibaw nga dili na maayo tan-awon.

Gawas pa, kadtong mga lugar nga mahimong gipuy-an ug gipangitlogan sa mga lamok, maapil na usab og tikwang aron kunhoran ang hulga sa sakit.

Sa ordinansa, ang tanang mga buhatan sa pribado og publiko, local nga mga kagamhanan, mga purok, tunghaan, mga establisemento ug mga institusyon gimanduan na sa pagpanglimpyo nianang adlawa.

Nanghinaut si Gob Chatto nga human sa Abril 7, himoon na nga regular nga kinaiya sa mga Bol-anon ang pagpanglimpyo. (rahc/PIA-7/Bohol) 

Nanghinaut si Gob Chatto nga ang pagdeklara sa Abril 7 isip Bohol Clean Up Day maoy sinugdanan sa maayong kinaiya nga kalimpyo og kahapsay, samtang gipangandaman sa Bohol ang nagsingabut nga ASEAN ug mga kapistahan. (rahc/PIA-7/Bohol)