Dam-agan Falls, gihimo’ng

subject sa visual artists

TAGBILARAN CITY, April 6 (PIA)—Malampuson nga gihimo sa mga visual artists sa Bohol and ikaduhang hugna sa Open Air Painting Session didto sa Dam-agan Falls sa Catugasan Dimiao Bohol, Abril 2. 

Dul-an sa 20 ka mga pintor sa oil ug acrylic, mga tigkulit, mga photographers ug mga mahilig sa arte ang miduyog sa tinguha sa lungsod sa Dimiao nga kahatagan og tourism exposure ang Dam-agan Falls. 

Gihimo usab kini agi og paghugpong sa mga visual artists sa Bohol ubos sa pagpanguna nila ni Joey Labrador, Rhants Anunciado ug mga kaubanan. 

Ang painting session sa Dam-agan nahitabo human sa laing painting session nga didto sa Sevilla sa na-una na nga Domingo.

Ang Dam-agan Falls, usa lamang sa daghang Falls nga igkita sa lungsod sa Dimiao, maoy giplanohan nga venue na usab sa April Falls nga programa sa San Nicolas Parish, matud ni tourism Officer Virgilio Namalata. 

Napauso na ug naa na sa ikaduhang tuig ang April Falls, usa ka inisyatiba ni Rev Fr. Jomari Polo, kura sa San Nicolas, aron ikapadayag ang mga tinagu-an nga katigayunang natural sa lungsod, alang sa katuyuan sa turismo. 

Laing mga Falls nga nindot usab nga himoan sa on the spot painting mao ang Ingkumhan sa Barangay Bauhugan, ug ang Pahangog Twin Falls sa Barangay Guinguyoran. 

Matud ni Anunciado, ilang gilaraw nga himoon na nga regular nga tapok sa mga visual artists ang open air painting sessions sa laraw nga hatagan nag exposure ug tsansa sa pag-ugmad pag dugang sa mga abilidad sa mga Bol-anong visual artists. 

Ang mga nahimo nga paintings sa lungsod, mahimong i-apil sa exhibit sa umaabut nga Saulog sa Tagbilaran human sa Mayo 1. 

Ang paghimo sa painting session usa usab ka pamaagi nga ugmaron og hatagan og higayon ang arte nga papadayag aron mamahimo kining himan sa pagpalihok sa tawo ngadto na sa kauswagan. (rahc/PIA-7/Bohol)