FOI, ASEAN ipadayag sa mga

mayor, opisyales sa Bohol

TAGBILARAN CITY, April 6 (PIA)—Tungod sa mahinungdanon sa dayag nga pangagamhanan ilabi na sa sangang ehekutibo, tapokon sa Presidential Communications Operations Office and mga mayor ug mga opisyal sa kabarangayan aron ikapatin-aw ang Freedom of Information (FOI). 

Ang pagtapok adto mahitabo atul sa Ugnayan: A Dialogue for Progress ng gipasiugdahan sa Philippine Information Agency adto sa Bohol Tropics sa Lunes, Abril 10, gikan sa ala una nagdto sa alas 5 sa hapon. 

Gawas sa FOI, hisgutan usab ang Philippine Chairmanship sa ASEAN 2017 ug ang mga implikasyon sa patigayon ug komersyo sa ASEAN sa rehiyon sa Central Visayas. 

Human sa taas nga lanat sa panahon nga gilalisan sa mga magbabalaod ang pagpalusot sa mekanismo nga magbukas ug magpadayag sa mga propseo sa kagamhanan, gipasupot ni Presidente Rodrigo Duterte ang FOI pinaagi sa paglagda sa us aka Orden Ehekutibo Number 2, series sa 2016. 

ANg FOI maoy tubag sa kagamhanan sa panawagan sa dayag nga pangagamhanan ug sa pagbukas na sa mga kasayuran nga angay mahibaw-an sa kadaghanan, matud pa ni Assistant Secretary Chris Ablan.

Ang FOI maoy mekanismo sa kagamhanan aron hatagan ang ordinaryong molupyo sa pagpangayo og mga kasayuran kabahin sa mga tansaksyon ug pagpadagan sa kagamhanan nga gigamitan sa kwarta sa katawhan, dugan niya. 

Hinuon, dili tanang kasayuran ang mahimong ipadayag tungod kay mga mga sensitibong kasayuran nga ang pagpagwas mahimong makayatak sa personal nga mga katungod sa katawhan ug makabikil sa nasudnong seguridad, segun pa sa FOI website. 

Apan, tungod sa walay pagpanaghiusa sa mga magbabalaod sa FOI bill nga gipanday, pabiling nag-ong-ang ang balaodnon hangtud nga mihukom na lang si Presidente Duterte nga ipagawas ang executive order alang niini. 

Sa Executive Order Number 2 EO 2 napahimutang ang mekanismo sa pagpagawas sa mga kasayuran, apan kini para lamang sa mga ahensya ubos sa Executive Branch, subay sa katungod sa kasayuran nga natala sa batakang balaod. 

Ug kay ang mga mayor, ubos man sa ehekutibo, kinahanglang masayud sila sa mga angayang buhaton aron mapadayag usab ngadto sa katawhan ang ilang mga pagpadagan sa serbisyo.

Tungod usab niini, misalign ang kadaghanan nga mosunod na ang Legislative Branch sa pagpadayag sa ilang mga proseso dala sa pressure kon hingpit nang ikapadagan ang FOI sa labing baga nga ahensya sa kagamhanan. 

Kasamtangang may 64 na ka ahesya sa kagamhanan ang misaad nga magbukas sa ilang mga pamaagi ug maghatag kasayuran subay sa FOI. (rahc/PIA-7/Bohol)