Mga sakop sa LGU BAC, gibansay 

pagkuha’g INREMP funds sa ADB

TAGBILARAN CITY, April 9 (PIA)—Gihan-ay na sa Department of Environment and Natural Resources (DENR) pinaagi sa pagpatin-aw sa mga proseso sa paghimo sa mga proposal alang sa Rural Infrastructure Sub Projects ngadto sa mga representante sa mga kalungsuran nga makabenepisyo niini. 

PInaagi sa proyekto nga Integrated Natural Resources and Environmental Management Project (INREMP), gihimo nag tulo ka adlaw nga Procurement Orientation ug Writeshop alang sa LGUs’ Rural Infrastructure Subprojects didto sa Dumaluan Beach Resort / Marilou’s Resort, Bolod, Panglao, Bohol niadtong Abril 4-6, 2017. 

May pundo unta gikan sa Asian Development Bank (ADB) nga magamit ang mga kalungsurang nasakop sa INREMP. 

Apan nasayran sa mga kalungsuran nga lisud i-avail ang pundo dala sa nagkabangi nga mga probisyones sa ADB Procurement Guidelines ug sa mga pamaagi sa LGUs sa paghimo sa harmonized Philippine Bidding Documents (PBD) alang sa endorsement niini ngadto sa ADB.

Ang mga kalungsuran nga may INREMP kinahanglan nga moduso una ngadto sa National Project Coordinating Office (NPCO) ug Foreign Assisted and Special Projects Services (FASPS) sa dili pa makalabang ang ilang mga hangyo ngadto sa ADB. 

Mitambong sa nahisgutang Procurement Orientation ang mga Bids and Awards Committees (BAC) ug sakop niini gikan sa mga kalungsuran sa Buenavista, Dagohoy, Danao, Pilar ug Talibon. 

Kining mga kalungsuran nga natumbok, nakaduso na sa ilang mga Detailed Engineering Design (DED) ug Subproject Documents (SPD).

Gawas sa mga nahisgutang mga sakop sa BAC sa mga kalungsuran, mitambong usab ang mga representante sa DENR PENRO Bohol BAC Members, ang Community Environment and Natural Resources Officers (CENROs) sa Talibon ug Tagbilaran City, aron magiyahan sa mga proseso nga gikinahanglang tamdum. 

Gihisgutan sa maong Procurement Orientation ang overview sa ADB Procurement Guidelines, INREMP Procurement Arrangements, PhilGEPS Procedure, Harmonized Philippine Bidding Documents alang sa Infrastructure ug Subsequent Procurement Activities ug Milestones. 

Aron dili masayang ang nakat-onan nga kahibalo, sulod sa bansaybansay, gipahimo ang mga participating LGUs sa ilang tagsatagsa ka Philippine Bidding Documents (PBD). 

Kini gisalang sa paghashas giniyahan sa mga resource speakers gikan sa NPCO ug FASPS nga sila si Ms Isabel D. Salas, Karlo Chanliangko ug Erwin Sangalang.

Mosunod na usab ang laing batch sa mga LGUS sa sasamang Orientation sa sunod nga kwarter, matud sa DENR. (rahc/PIA-7/Bohol)

Giabi-abi ni Gob Edgar Chatto ang mga sakop sa bahan sa ADB, NPCO aron usab ipadayag sa Gobernador ang mga kalisud nga nasinati sa mag kalungsurang buot mogamit na sa  pundo nga makuha unta gikan sa Asian Development Bank (ADB) apan may mga rekisitos kining wala pa mahipno. (rahc/PIA-7/Bohol)