Tabang pinansyal aron

mahugpong ang PWDs 

gikinahanglan –BFDPI

TAGBILARAN CITY, March 30 (PIA)—Suporta nga pinansyal alang sa pagsugod sa paghugpong sa mga persons with disabilities (PWDs) ang labing gikinahanglan aron makamugna sa unang lakang sa pagtabang pagpabarug sa mga may kabilinggan.

Kini maoy minugbo nga saysay ug sugyot sa Bise Presidente sa Bohol Federation of Disabled Persons (BFDPI) nga si Angelita Jumamil.

Sa pagpakighinabi sa Kapihan sa PIA, gibutyag ni Jumamil, kang kinsa’ng kabilinggan mao ang paralisadong kamot, nga bisan sa iyang kahimtang, iyang gihalad ang kaugalingon sa pagserbisyo sa pagmugna sa mga kahugpungan sa PWDs sa kalungsuran.

Apan human sa pipila ka tuig nga ila kining gilihok ang paghugpong sa mga PWDs aron matabangan, dili gayud kini makalahutay, kompisal ni Jumamil.

Kasagaran sa mga PWDs, nagkinahanglan og abag aron makalakaw, magkinahanglan og sakyan, butang nga dili maapas pundohan sa mga katawhan nga may kabilinggan.

Magkatigum sa una ug ikaduha nga buwan apan magkaanam kini og ka hilis, tungod kay wala nay ikaplete, hangtud nga mahimo na nga in-active ang mga chapter sa kalungsuran, dugang ni Jumamil.

Segun sa balaod, sa pahat sa lungsod sa Internal Revenue Allottment, kinahanglang may magastyo niini nga bahin sa 1 ka posyento alang sa mga senior citizens ug PWDs.

Segun sa Local Budget Memorandum nga napagawas, dungan sa paghimo og budget sa mga Lokal nga Kagamhanan, kinahanglang may katumbas sa 1 ka % sa ilang budget nga magsukip sa Programa, Kalihukan ug Proyekto alang sa Senior Citizens ug PWDs, subay sa Republic Act 9242.

Wala man itumbok kon magtunga ba sa pahat ang senior citizens ug PWDs, apan daghan sa mga kalungsuran ang wala maggamit sa pahat alang sa PWDs nga mahimo na unta nga ikasugod sa paghugpong sa mga mag kabilinggan, komentaryo ni Junary Baculio, presidente sa Bohol Persons with Disabilities Worker’s Association.

Didto sa Kapihan sa PIA, si Baculio mibutyag usab nga sa paghugpong lamang mamahimong mas epektibo ang pagpahiluna sa mga programa, kalihukan og proyekto sa mga PWDs tungod kay niini lamang makita ang labing mga gikinahanglan nila.

Ug sa dili pa kini mahitabo, kinahanglang mokanaug ug magpakita ang mga PWD aron makaapil sa pagplano, aron mapalusot usab sa LGU ang pundo alang sa PWDS.

Kon magamit pa lamang ang pundo alang sa PWDs aron may ikatunol sa sakop isip transportation allowance, may purohan nga ma engganyo kini nga motambong sa mga kalihukan og maapil na sa ihap, panapos ni Jumamil. (rahc/PIA-7/Bohol)