“Seal of good Housekeeping”

Ihatag sab sa mga tunghaan

TAGBILARAN CITY March 29, (PIA)—Dili lamang nagdto lang sa mga kabalayan ang sticker alang sa Seal of Good Housekeeping sa Bohol. 

Gisugyot na usab ngadto sa Provincial Peace and Order Council (PPOC) sa Bohol ang paghatag sa “Seal of Good Housekeeping” ngadto sa mga tunghaan. 

Kini human namatikdan sa mga tinugyanan nga ang supply ug demand reduction phase sa gubat sa Bohol batuk sa illegal nga drugas mamahimong malungtaron kon may mga kalihukan batok sa drugas nga adto sa mga tunghaan magasukad. 

Partikular nga gitan-aw sa mga tinugyanan sa PPOC ang mga kalihukan sa mga tunghaan nga magsilsil sa mga alimpatakan sa kabataan ang kakuyaw sa paggamit sa illegal nag drugas.

Matud ni Gob. Edgar Chatto, tsirman sa PPOC nga kon ang mga tunghaan maghimo sa mga kalihukan nga subay sa tumong nga pagkunhod sa mga mogamit sa illegal nga drugas, mamahimo kining dako nga tampo sa nagpadayong gubat batok sa sagbot sa katilingban. 

Sa matag kalihukan nga himoon sa us aka eskwelahan, aduna kini katumbas nga mga puntos ug kon ang natigum nga mga puntos gikan sa mga kalihukan, makaabut na sa gikasabutang gidaghanon, ihatag na niini ang selyo nga nagtimaan sa aktibong pagsalmot sa gubat batok sa drugas. 

Subay sa mga kalihukan nga magamit sa mga eskwelahan mao ang mga poster making contests, jingle writing, essay writing, komiks, extemporaneous speaking ug mga debate, batok sa illegal nga drugas. 

Kining tanan itumong aton ang ga kabataan sa mga tunghaan makabaton sa mas lapad nga kasayuran kabahin sa illegal nga drugas ug mopili na mga likayan ang haylo sa nahisgutang bisyo. 

Dugang ni Chatto, human sa Semana Santa, sugdan na sa Bohol ang pagpahimutang sa mga sticker sa Seal of Good Housekeeping ngadto sa mga panimalay sa purok nga wala masamok sa hulga sa illegal nga drugas. 

Makaangkon lamang ang usa ka panimalay sa Seal of Good Housekeeping kon ang tanang sakop niini wala malambigit sa illegal nga drugas, o kon ang mga sakop niini nga nagumon sa illegal nga bisyo, misurrender na ug mipailawom sa rehabilitasyon, segun sa gipahigayon nga Community Based drug Rehabilitation Program without walls (CBRP WoW). (rahc/PIA-7/Bohol)

Ilhon na usab ang mga tunghaan sa ilang mga lakang sa kampanya batok sa illegal nga drugas, kini maoy nahukman sa PPOC sa bag-ong tigum niini. (PIABOhol/hulagway sa ABSCBN.com)