National broadband program, 

aprubado na ni Duterte

MANILA, March 7 (PIA)--Giaprubahan na ni Presidente Rodrigo Duterte ang pagtukod og National Government Portal ug National Broadband Plan.

Kini human sa ika-13 nga Cabinet Meeting nga gipahigayon kagahapon sa Malakanyang.

Giingong giaprubahan sa Presidente ang maong plano human ang presentasyon ni Department of Information and Communications Technology (DICT) Kalihim Rodolfo Salalima.

Si Presidente Duterte nagkanayon nga mahinungdanon ang pagbaton og paspas nga internet connection sa nasod mao nga gusto niyang mohimo ang DICT og national broadband plan aron mapadali ang pagbutang og mga fiber optics cables ug wireless technologies sa Pilipinas.

Sa pagkakaron, nahimutang sa ikaduhang dapit ang Pilipinas sa listahan sa may pinakahinay nga internet sa 22 ka nasod sa Asya.

Samtang gihangyo usab ni Presidente Duterte sa maong Cabinet Meeting sa Department of Budget and Management (DBM) nga lili-on, susihon ug amyendahan ang procurement law.

Kini tungod kay dili uyon ang Presidente sa gipatumang kanunay lamang nga ang lowest bidder ang modaug sa mga kontrata sa gobyerno tungod kay dili man magarantiya ang maayong kalidad bugti sa baratong presyo. (ecb/PIA7-Bohol)