P65 M pagpahi-uli sa Cortes 

waterworks sugdan na -Lim

CORTES, Bohol, March 8, (PIA)—Human sa tulo ka tuig, andam na nga ikapatuman ang P65 milyones nga pagpahiuli sa patubig sa Cortes. 

Kini matud pa ni Mayor Ivenn Lynn Lim sa iyang pagpamulong dili pa lamang dugay. 

Kahinumduman nga may kasaligan na unta nga panubig alang sa mga kabalayan sa Cortes, apan ang linog sa 2013, miguba sa daku nga bahin sa patubig. 

Daghang tangke sa tubig (reservoir) ang nangliki, ang mga linya sa tubig nangaputol ug ang mga tinubdan sa tubig nangapilot dala sa pagkahunlak sa yuta. 

Pinaagi sa Bohol Earthquake Assistance 1, nakakuha ang lungsod sa P65 milyones nga pundo alang sa pagpahiuli sa panubig sa lungsod, pasabut sa mayor kinsa naa pa sa iyang unang termino. 

Atubangan sa mga opisyales sa kapolisan sa rehiyon ug sa lalawigan sa Bohol, gipadayag ni mayor Lim nga natunol na ang kontrata ug gani, misubay na ang kontraktor sa Buhatan sa mayor aron ipahibaw nga sugdan na ang mobilization alang sa proyekto sa sunod semana. 

Ang pagpadayag sa mayor, dungan usab sa pagtunol sa kapolisan sa P4.87 milyones nga tulo ka andanang bag-ong estasyonan sa kapolisan. 

Dayag sa mayor, ang bag-ong police station maoy labing unang imprastraktura nga gipundohan sa kagamhanan nga napabarug sa iyang termino. 

Didto sa pagtugyan sa nahisgutang gambalay alang sa kapolisan, gibutyag sa mayor nga unta, mao na kini ang sinugdanan sa Bag-ong Cortes.

Nagtuo ang mayor nga kon wala pay tataw nga pagtinabangay sa tanang Cortesanon, wala gayuy mahitabo nga kaugmaran. 

Alang sa bag-ong building sa kapolisan, matud sa Mayor nga ang donasyon sa luna nga gitukoran dugay na nga nadonar sa Cortes. 

Gawas pa, daghan na ang naningkamot aron mapatinuod ang damgo sa kapolisan nga makapabarug og kaugalingong buhatan, nga mitumod na usab sa pagkatugyan niini sa lungsod. 

Mismo si Police Regional Director PCSupt Noli Taliño mapasalamaton sa tinabangay ug iyang gimandu-an ang kapolisan sa Cortes sa pagsukli sa maayong buhat sa mga taga Cortes. 

Ang maayong tinabangay angay lamang sukli-an sa maayong serbisyo, bungat ni Taliño. 

Niini, midason usab si Lim nga kon walay tataw nga kahusay ug kalinaw sa lungsod, wala gayuy kaugmaran nga moturok. Niini, iyang giaghat ang kapolisan nga ubanan ang mga opisyales sa lungsod sa maayong tinguha niini. (rac/PIA-7/Bohol)

Nanghinaut si Mayor Ivenn Lynn Lim sa Cotes nga ang pagbarug sa bag-ong estasyonan sa kapolisan mao nay sinugdanan sa dagway sa bag-ong Cortes. Sa di madugay, sugdan na ang P65M nga pagpahiuli sa naguba nga panubig sa lungsod, samtang sa katapusan ning tuig, gilauman na usab nga kabalhinan na ang ilang bag-ong munisipyo. (rac/PIA-7/Bohol)