PCOO, magpatuman og reorganisasyon;

Office of the Press Secretary, ibalik

TAGBILARAN CITY, March 8 (PIA)--Magpatuman og reorganizasasyon ang Presidential Communications Operations Office (PCOO).

Matud pa ni PCOO Kalihim Martin Andanar, lagda na lamang ni Presidente Rodrigo Duterte ang gipaabot aron tangtangon na ang PCOO ug ibalik ang Office of the Press Secretary.

Dungan niini, gibutyag ni Andanar nga si Presidential Spokesman Ernesto Abella na lamang ang mahimong mohatag karon og mga pahayag gikan sa Malakanyang.

Kini ang gipahibalo ni Andanar atol sa dinner meeting niini kauban sa mga opisyal sa Kapisanan ng mga Brodkaster ng Pilipinas (KBP) Cebu Chapter nga gipahigayon niandtong Marso 2 sa gabii sa Golden Prince Hotel sa syudad sa Sugbo. 

Gipasabot ni Andanar nga mo-sentro na lamang ang PCOO sa pagdumala sa mga departamento ug mga state run media groups nga naa ubos sa iyang buhatan samtang si Abella usab ang motutok sa “content and messaging”.

Apan miingon si Andanar nga mahimo gihapon siyang mosulti sa media kun wala si Abella.

Apil sa mga buhatan sa gobyerno nga ubos sa pagdumala ni Andanar mao ang PTV 4, Radio-TV Malacañang, Radyo ng Bayan, APO Production Unit, National Printing Office ug Philippine Information Agency (PIA). (ecb/PIA7-Bohol)

Si PCOO Sec. Martin Andanar atol sa dinner meeting kauban ang mga opisyal sa Kapisanan ng mga Brodkaster ng Pilipinas (KBP) Cebu Chapter ug ubang media heads sa Sugbo nga gipahigayon niadtong Marso 2 sa gabii sa Golden Prince Hotel sa syudad sa Sugbo. (ecb/PIA7-Bohol)