Seguroha ang saktong kasayuran

pagparehistro, tambag sa PSA

TAGBILARAN CITY, March 10 (PIA)—Likayan kanunay ang pagkasayop sa entry sa porma alang sa registration for live birth.

Kini maoy pahimangno sa Philippine Statistics Authority (PSA) ngadto sa mga ginikanang bag-ong nakabaton og anak ug iparehistrohay pa lamang. 

Kini, tungod kay kon maduso na ngadto sa PSA ang sayop nga porma, mao na kini ang isipon nga sakto, pahibaw ni Emmanuel Galab, information Officer sa PSA Bohol. 

Dugang sa PSA, daghang kahasul ang dala kon ugaling sayop na daan ang kasayuran nga giduso sa PSA. 

Gani, butyag sa mga tinugyanan, daghan na nga kaso nga may mga sayop sa entry, ug aron dagway nga makalusot, may mga ginikanan nga moduso og bag-ong registration papers subay sa Late Registration, aron kuno mapasakto na ang sayop nga impormasyon. 

Apan, segun sa PSA, dili na gyud marehistro ang bata tungod kay kon ikatandi na ang mga detalye sa registration, mogawas man gayud ang mga ginikanan, mga detalye sa pagpanganak, ug di kalikayan nga mogawas ang unang narehistro nga pangalan sa bata. 

Hinuon, si kanhi Presidente Benigno S. Aquino III milagda ug nagpahimong balaod sa Republic Act No. 10172 nga nagtugot na sa City og Municipal Civil Registrar o ang Consul General sa pag-usab sa mga celerical o Typographical nga sayop sa adlaw ug buwan nga natawhan o ang kasarian sa tawo. 

Kinahanglan lamang nga moadto sa buhatan sa Local Civil Register bisan pag wala nay mandu sa Korte. 

Apan sa uban nga mga sayop nga entry, labing hasul na gayud ang masinati sa tagtungod, dugang sa PSA. 

Tungod niini, tambag sa mga tinugyanan, sa dili pa iduso ang registration forms, balikbalikon gayud kini og subay kon may sayup ba tungod kay mahimong ikahasud usab sa bata ang sayup nga identity. (rac/PIA-7/Bohol)

Segurohang walay sayop sa entry sa porma alang sa pagrehistro sa bata aron dili mahasul, kini maoy tambag sa mga tinugyanan sa PSA atul sa Kapihan sa PIA sa milabay nga semana. (PIABohol)