"Behold Bohol" ug duha 

pa ka programa gilusad

TAGBILARAN CITY, April 21 (PIA)--Gilusad didto sa Bohol Tropics Resort ang bag-ong slogan sa Bohol dungan sa paglusad usab sa duha pa ka laing programang abag sa turismo sa Bohol.

Sa internal launching sa "Behold Bohol" slogan lakip na ang logo, jingle ug ang brand Bohol, gilusad usab and Behold Bohol mobile phone apps ug ang "Film-it-in-a-Minute."

Matud ni Bohol Tourism Council Chairman Atty Lucas Nunag, ang bag-ong slogan ug mga produkto, bunga sa pagpaningkamot sa mga lumilihok sa turismo dinhi sa Bohol gikan sa sektor sa kagamhanan, ug sa pribadong mga pundok.

Kini usab inabagan sa USAID, Department of Tourism, United Nations World Tourism Organization, ug CNN.

Misalig si Atty Nunag nga ang bag-ong brand sa Bohol motabang sa pagpalig-on sa dapit nga giyak-an sa Bohol isip nag-una nga eco-cultural tourism destination sa nasud, ug sa kinatibuk-ang rehiyon sa ASEAN.

Alang sa mga wala pa masayud, ang Bohol misagop na sa usa ka bag-ong slogan, usa ka brand nga mipaluma sa kinaiyang Bol-anon ug migamit sa mga bolok nga habig sa kalikopan, yano ug dali kahinumduman nga mga hulagway ug gaan nga mga linya.

Apan uban niana, gilusad usab ang Behold Bohol: usa ka mobile phone application nga mahimong idownload sa android phones.

Ang apps, matud ni Thomas Ridenour kinsa maoy naghimo sa apps, may 150 ka mga destinasyon sa Bohol ug mahimong idownload sa 5 ka pinulongan.

Ang apps nga nadownload na sa pipila ka mga backpackers maoy hinungdan nga mingdugay ug pundo sa Bohol ang pipila ka turista, inay usa ka adlaw lang ang ilang plano.

Mahimong magamit bisag offline, ang apps maghatag sa yano nga mga tubag sa distansya sa sunod nga suroyanan, mga kan-anan nga maagi-an, mga pletehan, ug uban pang kasayuran kabahin sa Bohol.

Sa laing bahin, gipadayag usab ni Cesar Montano, Bol-anong chief executive officer sa Tourism Promotions Board (TPB) sa Department of Tourism (DOT) ang usa ka proyektong makatabang sa Bohol.

Inabagan sa Film Development Academy of the Philippines, ilusad sa TPB ang Film-It-In-A-Minute, alang sa mga turista.

Gipasabut ni Montano, kinsa bisan pa niadto mihimo na sa pagduso sa Bohol pinaagi sa iyang mga lilas, nga ang proyekto magkinahanglan lamang nga maghimo ang turista ug usa ka minuto nga video sa iyang ikasugilon sa kanindot sa Bohol nga suroyan, ug kini ipasa ngadto sa TPB.

Kon mapili-an sa TPB, ang makadaug makakuha og dugang pang libre nga hotel accommodations sa mga resorts nga kaabag sa DOT sa programa ug kahigayunan sa pagsuroy pa.

Kining tanan, matud ni Atty Nunag, bisan pa sa subo nga mga hitabo dala sa mga teroristang naghasi sa Bohol, wala gaud moundang ang Bohol sa paghimo sa lalawigan nga usa ka makalingaw nga suroyanan.

Gipasidunggan usab dungan sa paglusad sila Lourd Pocon sa iyang pagdebuho sa logo sa behold Bohol, si Joseph Gara sa paghatag og musika sa Behold Bohol jingle, si Marianito Luspo alang sa lyrics sa jingle, si Nabela Gudito kinsa maoy mingkanta sa jingle ug si Thomas Ridenour sa Behold Bohol App. (rahc/PIA-7/Bohol)

Gipasabut ni Cesar Montano ang pamaagi sa Film-It-In a Minute, agi og tampo sa Tourism Promotions Board sa pagkampanya sa Bohol taliwa sa hulga nga dala sa mga bandidtong teroristang buot manghasi dinhi. (rahc/PIA-7/Bohol)