NGCP nagpahibaw sa

brown-out sa Sabado

Ang National Grid Corporation of the Philippines (NGCP) nagpahibaw sa maintenance activities nga mahimong maka-angin sa serbisyo sa sugang dagitab sa pipila ka bahin sa Bohol karong SABADO, ABRIL 29, 2017.

Ang kalihukan sa pagmintinar sa ilang mga imprastraktura sa koryente, magsugod sa alas 5:00 sa sayong kabuntagon ngadto na sa alas 6:00 sa sayong kagabhi-on ug makaapekto sa Macaas SubStation sa BOHECO 1.

Magahimo ang NGCP sa pagpangpuli sa mga poste nga nangalata na'g nagabok samtang pamulihan usab ang mga babag nga angay nang ilisan aron kalikayan ang mas grabeng pagkapakgang sa serbisyo sa koryente.

Ang maintenance activities magtutok sa mga linya subay sa 69 KV nga gikan sa Tubigon ngadto sa Corella.

Hinuon gipasalig na sa NGCP nga ilang paninguhaon nga ikabalik ang serbisyo sa labing dali nga panahon kon dili man ugaling, sa tukmang oras nga gipahibaw.

Alang sa dugang kasayuran kon haing dapita ang gialagaran ning linya nga trabahoon ang maapektohan, ang BOHECO na ang mas nasayud, matud pa sa NGCP.

Busa, gitambagan na ang mga mahimong apektado niini sa paghimog mga lakang aron mapangandaman ang pagkapawong sa serbisyo. (rahc/PIA-7/Bohol)