LMP mipasalig suporta

Pagpalig-on sa DOST

TAGBILARAN CITY, May 8 (PIA)—Gipasalig ni Clarin Mayor ug League of Municipalities of the Philippines (LMP) Bohol chairman Allen Ray Piezas ang suporta sa tanang mayor ngadto sa Department of Science and Technology (DOST) sa bag-ong lakang nga palig-onon ang Provincial Science and Technology Centers niini. 

Didto sa pagpresentar sa mga balaodnon nga iya sa Committee on Science and Technology sa Ubos Balay Balaoranan, si Mayor Piezas namahayag sa suporta samtang kini gidasonan sa mga mayores nga kasagaran nagagikan sa ika dugang distrito sa Bohol. 

Gipangunahan ni Clarin Mayor Piezas ang mga mayores nga misanong sa pagtambong sa Public Hearing sa duh aka balaodnon nga mag kalambigitan sa Siyensya ug Teknolohiya. 

Ang public hearing alang sa proposed House Bill 1205 nga magapalig-on sa mga provincial STCs sa nasud ug ang pagsagop sa bag-ong imprastraktura alang sa pag sukod ug pagtimbang alang sa patigayun sa Pilipinas. 

Matud ni Piezas, ilang iendorso ngadto na sa pagpalusot sa balaodnon tungod kay nakita nila ang dako nga panginahanglanon nga palig-onon ang mga buhatan sa DOST sa mga lalawigan. 

Ang DOST may mga PSTCs sa lalawigan, ang buhatan nga natahasan sa pagpatuman sa mga nag-unang programa sa kagamhanan sa pag-asdang sa kaugmaran pinaagi sa siyensya ug teknolohiya. 

Nasayran nga alang sa 47 ka lungsod og us aka syudad sa Bohol, aduna lamay tulo ka tawo ang DOST, laing duha ang gisweldohan alang sa pagpatuman sa mga espesyal nga proyekto. 

Ang DOST maoy may labing makalulo-oy nga staffing pattern kon itandi sa mga susamang ahensya mga nagtabang sa pagbuntog sa kawad-on pinaagi sa pagpakatap sa teknolohiya. 

Matud ni DOST undersecretary for Regional Operations Brenda Manzano, dili lisud iduso ang pagpalig-on sa PSTC ilabi na sa dakung tabang niini alang sa mga programa sama sa Small and Medium Enterprise Technology Upgrading Project (SET-UP) nga daku kaayug gikatabang sa mga mamumuhunan sa food, furniture, gifts ug duwaan toys, housewares, marine ug aquatic products, horticulture, metals ug mga teknolohiya sa engineering. 

Segun sa sponsor sa balaodnon nga si Congressperson Divina Grace Yu, gikan sa 2002 ngadto sa 2012, ang DOST naga-abag pinaagi sa pagtukas sa teknolohiya sa 16,292 micro, small ug medium enterprises nga nakabukas sa kapanarbaho-an sa 34,304 nga tabahante. 

Kining tanan, matud niya, miresulta na sa P73 billion nga halin. 

Didto sa public hearing sa imaging semana didto sa Bee Farm sa Dauis, si Piezas giubanan usab nila Talibon Mayor Restituto Auxtero, Getafe mayor Shaun Cassey Camacho, Buenavista Mayor Ronald Lowell Tirol, Danao Mayor Natividad Gonzaga, Dagohoy Mayor Sofronio Apat, San Miguel Mayor Nunila Pinat, Bien Unido Vice Mayor Rene Borenaga, Inabanga Vice Mayor Rodrigo Jumamoy, mga municipal administrators ug lokal nga mga opisyales. (rahc/PIA-7/Bohol)

Lig-on nga suporta ang nakuha sa DOST pinaagi kang Congresista Aris Aumentado, tsirman sa Congressional Committee on Science and Technology kalabut sa balaodnon pagpalig-on sa DOST PSTCs. Dihi, nakig-estorya si Cong Aumentado kang Vicky Sandidge, tag-iya sa Bee Farm, us aka benepisaryo sa PSTC Bohol samtang namati sila Buenavista Mayor Ronald Lowell Tirol ug Getafe Mayor Sahun Cassey Camacho. (rahc/PIA-7/Bohol)