Gen Taliño manguna sa

mga bike for peace events

TAGBILARAN CITY, May 8, (PIA)—Agi og pagmatuod nga walay delikado ang pagsuroy sa Bohol, pangunahan ni Police Regional Director Noli Taliño ang mga bikers alang sa mga bike for Peace events nga himoon sa kalungsuran. 

Sa Martes, Mayo 9, manguna si General Taliño ug mga kadagko-an sa Kampo Dagohoy pinaagi ni PSSupt Felipe Natividad ang mga bikers kinsa mopakita sa pwersa pinaagi sa pagsakay sa mga bisekleta gikan sa Kampo Dagohoy paingon sa Panglao, ang numeo uno nga destinasyon alang sa beaches sa Bohol. 

Mobiya ang bahan sa nagkampanya sa kalinaw sa alas 5:00 sa buntag Mayo 9 paingon sa Cultural Center sa Panglao diin mahitabo ang hamubo nga programa subay sa nahisgutang tema.

Ang fun ride for Peace gilauman nga matapos sa alas 8:00 sa buntag samtang ang ubang misalmot sa ride mahimong mosikad og balik ngadto sa Tagbilaran. 

Hinuon, may gipasalig nga sakyanan nga kakargahan sa mga bikers nga dili na interesado nga mosikad og balik sa nahibiling 18kilometros, matud ni Police Officer Jennifer Atanacio. 

Sa Miyerkules pohon, Mayo 10, lain na usab nga fun bike for peace ang magsugod sa Jagna sa alas 5:00 sa kaadlawon paingon sa Quinale Beach sa Anda, mga 35 kilometros. 

Ikauban usab sa PCSuperintendent Noli Taliño ug PSSupt Felipe Natividad sa sikad, nag apila usab sa pipila ka kasundalohan ug kapolisan, lakip na ang mga tigsuporta sa kalinaw.

Inig abut sa Anda, may mga pakigpulong-panudlo nga himoon ang kapolisan kabahin sa terorismo, kriminalidad ug uban pang hulga sa kaugmaran. 

Ang duha ka fun rides maoy magsilbi nga warm-up sa mga Bol-anong bikers nga mo-apil sa 6th Unity Ride libot sa 264 ka kilometro nga lalawigan sa Bohol. 

Ang duh aka adlaw nga unity ride manawagan usab alang sa kalinaw, pag-amping sa kalikopan ug sa pagduso sa turismo ug maayong panglawas.

Ang Unity ride mahitabo sa sabado-Domingo, Mayor 13-14, gikan sa Tagbilaran libot sa Talibon ug balik sa syudad, matud sa TriBohol, tigpasiugda sa tinuig nga kalihukan. 

Kahinumduman bnga napakgang sa mga tinugyanan ang laraw sa mga bandidong Abu Sayyaf nga maghimog teroristang kalihukan dinhi sa Kabisay-an. 

Sa mga panagbagat sa mga pwersa sa kagamhanan ug Abu Sayyaf, daghang mga embahada ang mipagawas ug tambag batok sa pagbyahe sa Bohol, nga mahimong makaapekto sa turismo dinhi. 

Ang riders for peace milaum nga ikapakita nga luwas gihapon ang Bohol bisan pa sapadayong hulga sa duh aka sakop nga bandidong wa pa hidakpi hangtud karon. (rahc/PIA-7/Bohol)

Dili lumba sa sikad, kon dili sikad para ibalik ang Bohol sa pangunahan sa lumba alang sa turismo, kini maoy tumong sa fun rides nga gipasiugdahan sa Philippine National Police ug mga tawong mahigugmaon sa kalinaw sa Bohol. (rahc/PIA-7/Bohol)