Rene nagtunol usab og gasa

sa katawhan sa Pamilacan 

TAGBILARAN CITY, May 19, (PIA)--Sa pagtambong ni Kongresista Rene Relampagos sa pagtugyan sa P10 milyones nga pasilidad sa solar nga gahum dagitab aron magamit na sa Pamilacan ang ilang mga dekoryenteng gamit, laing gasa ang bitbit sa Kongresista. 

Sa iyang pakigpulong didto aron hatagag dugang inspirasyon ang katawhang may alibyo na sa kinabuhi pinaagi sa dugang walo ka oras nga koryente, gipahibaw sa kongresista nga kanhi tsirman sa komite sa Turismo nga makapaabut na ang mga taga isla sa P2 milyones nga pundo alang sa pagpalapad sa kapin sa dos kilometros nga dalan nga nagatadlas dinhi.

"Paabuta kay nasulod na sa 2018 nga General Appropriations Act (GAA) ang pundo alang sa road widening," butyag ni Relampagos, nga gibawsan usab sa katawhan sa mainitong pagpakpak. 

Gawas sa pundo sa pagpalapad sa apike nga sementadong dalan sa isla, nagbitbit usab ang Kongresista sa 10 ka set sa blood pressure apparatus ug laing usa ka Detecto nga timbangan alang sa paggamit sa 8 ka mga Barangay Heath Workers nga nangalagad sa serbisyo sa kasanihan sa 1800 ka mga residente didto. 

Alang sa 18 ka mga barangay tanods, 20 ka uniporme usab ang gitunol ni Relampagos. 

"Hinaut nga ang atong mga gihatag mag-aghat pa kanato sa mas maayong serbisyo,| panghinaut sa kanhi gobernador nga karong maoy representante sa Bohol First District. 

Si Relampagos, kinsa kanhi kauban sa seminaryo sa Chief Executive Officer sa Wegen Philippines, mipalubad usab nga apil siya sa paghangyo nga maangkon sa taga isla ang limpyo ug renewable nga tinubdan sa koryente. 

Ang Wegen uban sa Kagamhanan sa Alemanya mihatag ngadto sa Pamilacan sa P10 milyones nga pasilidad nga makahatag og 30 kilowatt peak nga koryente nga magamit sa 329 ka panimalay sa Pamilacan sa panahon sa adlaw. 

Gilaraw usab sa mga taga Pamilacan ug sa Wegen nga kadugangan pa ang kapasidad sa solar energy sa isla aron mahimo na nga mapun-an pa ang kuwang nga supply sa koryente kon magabii na. 

Tungod sa kalayo sa Pamilacan, nga naa sa 18 kilometros gikan sa mainland Baclayon, dili na viable ang pagkutay sa submarine cables aron makakuhag koryente ang taga isla gikan sa Bohol Grid. 

Kining panginahanglan, gihulipan sa Wegen kinsa nagpahimutang sa 135 ka photo voltaic solar panels nga mosagap sa init sa adlaw ug iconvert kini isipp koryenteng magamit sa panimalay. 

Ang matigum nga koryente isulog sa 60 ka mga baterya aron usab matago ug magamit sa panahon nga gikinahanglan na. (rahc/PIA-7/Bohol)

May bitbit usab nga pasalubong si Kongresista rene Relampagos sa mga taga Pamilacan sa iyang pagtambong sa pagtugyan sa P10M nga pasilidad sa solar. Kini ang pundo sa pagpalapad sa dalan sa isla, gamit sa BHW ug uniporme sa mga tanod. (rahc/PIA-7/Bohol)