Magamit ang SEF kon kuygan

sa napahaum nga legislasyon

TAGBILARAN CITY, May 19, (PIA)--Gawas kon may pataban nga pagtugot pinaagi sa usa ka balaod, dili mahimo nga gamiton ang Special Education Fund (SEF) sa mga opisyal sa kalungsuran aron ipamalit sa mga uniporme, bag ug gamit sa pagtungha. 

Kini maoy gitataw ni Department of Education Bohol Division Supervisor ug Information Officer Lope Hubac dihang gipangutana kon unsay mga pamaagi nga magamit ang espesyal nga pahat sa SEF.

Dungan sa pagpatin-aw sa DepED kabahin sa SEF ilabi na sa panahon nga buksan na usab ang laing school year, si Hubac mipahimangno usab nga dili magamit ang SEF alang sa traveling allowances sa mga magtutudlo.

Didto sa Kapihan sa PIA, gipatin-aw sa DepED ang paggamit sa SEF ilabi na sa nagpadayong Brigada Eskwela diin daghang kalungsuran ang walay mahikap nga pundong magamit sa pagpahiuli sa mga tunghaan aron i-andam sa pagbukas sa klase. 

Ubos sa Republic Act 7160, ang mga lokal nga kagamhanan gitugotan sa pagkolekta sa 1% sa tinuig nga buhisan aron mamahimong pundo alang sa SEF. 

Apan segun sa balaod sa SEF, ang pundo maoy kuhaan sa tinuig nga dugang panginahanglang pahat o supplementary budget needs aron sa pagmintinar sa mga pangpublikong tunghaan sulod sa lungsod. 

Ang paggamit sa SEF sama sa pagplano sa galastohan niini, pagpalusot sa pundo ug sa paggasto sa SEF responsibilidad gihapon sa Local school Board human kini kahatagag tukmang balaod sa paggasto. 

Kahinumduman nga may mga lokal nga kagamhanan nga bisan pag walay tukmang lehislasyon, mikuha sa SEF aron ipamalit sa mga gamit sa tunghaan, uniporme ug mga allowances sa mga magtutudlo. 

Sa seksyon 272 sa RA 7160, kini nagbutyag nga ang SEF magamit alang sa pagpadagan ug pagmintinar sa pangpublikong tunghaan, pagtukod og pagpahiuli sa nangaguba nga tunghaan, paghimo sa educational research, pagpamalit og mga libro ug pagpa-ugmad sa sports. 

Gitugot usab nga gamiton ang SEF alang sa pagsweldo sa mga magtutudlo kon dunay panginahanglan, apan segun sa palisiya, kinahanglang dili kini molabaw sa gisweldo sa ubang trabahante sa lungsod ug dili molapas sa suholan sa regular nga magtutudlo sa DepED. (rahc/PIA-7/Bohol)

Pwede nga magamit ang SEF kana kon paubanan sa tukmang lehislasyon, pahimangno sa DepED pinaagi si supervisor Lope Hubac, kinsa maoy guest sa Kapihan sa PIA niadtong Huwebes.Migawas ang pahimangno samtang ang DepED ug ang katawhang misuporta niini nagpahigayon sa Brigada Eskwela plus taman sa Sabado, Mayo 20.  (rahc/PIA-7/Bohol)