Pagdala’g bag sa Saulog

Gihangyo nga a-likayan

TAGBILARAN CITY, April 27 (PIA)—Sa labing unang dakong bukas nga tapok sa katawhan sa Saulog StreetDancing Festival sa Tagbilaran, may hangyo ang mga nagtutok alang sa seguridad sa dakong kalihukan: likayan ang pagbitbit sa mga bag nga wala gikinahanglana kon mosaksi sa parade ug mga pasundayag. 

“Atong gibugnaw ang katawhan nga ganahan magbitbit og bag, tungod kay ipatuman sa mga tinugyanan sa syudad ang paghiling sa mga dala sa mga tawo ug kini seguradong maoy makalangan, matud ni Mayor John Geesnell Yap atul sa City Peace and Order Council (CPOC) meeting Abril 27. 

Ang pagpatuman sa paghiling sa mga bitbit sa katawhan nga mosulod sa CPG Sports Complex aron motan-aw sa mga pasundayag dungan sa Streetdancing, gisagop subay usab sa padayon nga hulga sa pagpamomba dala sa nabalda nga laraw sa mga teroristang buot magsamok sa Bohol. 

Ang Saulog Street Dancing Festival nga ipahigayon atul gayud sa kapistahan ni Senyor San Jose sa Tagbilaran gilantaw nga magpatapok sa labing menos dos mil ka mananayaw, instrumentalista ug mga propsmen, ug liboan usab ka mamistahay nga moatul og panan-aw sa parade ug pasunding sa kadalanan. 

Ang parade usab maoy gitumbok nga labing unang labing dako nga tapok sa katawhan human ikaparang sa mga tropa sa kagamhanan ang mga sakop sa Abu Sayyaf didto sa Inabanga ug Clarin. 

Didto sa lugar nga temporaryong gipuy-an sa mga sakop sa Abu Sayyaf, nahipos sa mga tinugyanan sa kagamhanan ang mga kahimanan sa paghimo og improvised explosive devices, o mga bomba. 

Nabawi usab sa mga tinugyanan ang mga kagamitan sa pagpaboto sa bomba didto sa balay nga giabangan sa giingong pulis nga naglaraw nga moluwas sa mga nahibiling sakop sa Abu Sayyaf didto sa Inabanga ug Clarin. 

Ang presensya sa himan sa pagpamomba, mga kagamitan sa paghimo niini ug ang bomb detonating devices nga nakuha sa mga terorista nagtumbok lamang sa makahadlok nga laraw sa pagpamomba, nga mahimong dinhi gitumong sa Bohol. 

Dala sa nagpadayong hulga samtang may mga sakop pa sa teroristang bahan ang padayong nagtagotago, ipatuman sa kagamhanan ang mas hugot nga seguridad, matud ni Mayor Yap.

Subay pa niini, hangyoon sa syudad kadtong tanang establisemento nga anaa nagbarug subay sa ruta sa Saulog parade sa pagbukas sa ilang tanang CCTV cameras sa panahon sa parade aron makatabang sa pagbantay ug pagpakgang sa mga mosuway sa pagtanum og kagubot, dugang ni City Administrator Leonides Borja. 

Niini, nangayo na daan og dispensa ang mga tinugyanan sa syudad sa kahasul nga dala sa ilang ipatuman nga mga lakang sa pagseguro nga luwas ang kalihukan. (rahc/PIA-7/Bohol)

Si Mayor John Geesnel Yap nanghangyo sa mga moduyog sa Saulog Streetdancing ug mga manan-away, likayan ang pagdala’s bag kay tagsa-tagsa-on og hiling paglig-on sa seguridad taliwa sa hulga sa terorismo. (PIABohol/hulagway ni Ric Obedencio)