Tagbilaran naghipno'g giya 

sa kaugmaran sa turismo

TAGBILARAN CITY, April 26 (PIA)--Makapaabut ang mga Tagbilaranon nga masagop na dili madugay ang usa ka panglantaw nga maoy mag-giya sa turismo sa syudad.

Kini human taposa sa mga tinugyanan sa Syudad ug sa City Tourism Council ang Tourism Strategic Planning Workshop aron ilhon ang pangindahay sa mga taga Tagbilaran kabahin sa pagpa-ugmad sa turismo niini hangtud sa 2022.

Gitambongan sa mga nagkadaiyang representante sa mga sektor sa syudad lakip na ang mga kadagku-an sa turismo sa Bohol, ang duha ka adlaw nga strategic planning nga didto gihimo sa Jjs SeaFoods Village Abril 25-26, dugay na nga gilaraw ug karon lamang napatinuod.

Tumong sa maong workshop mao ang paghulma sa giya alang sa pagpa-ugmad sa turismo sa syudad sa Tagbilaran sa sunod nga lima ka tuig, pasabut ni Shobel Lofranco Ligalig, City Tourism Officer.

Mitambong sa workshop ang mga representante sa mga nagkadaiyang sektor sa Tagbilaran, lakip na ang pipila ka National Government Agencies, barangay local governments, mga mamumuhunan, mga tiglihok sa industriya, representante sa kabataan ug kababayen-an, non government organizations lakip na ang mga kadagku-an sa turismo sa Tagbilaran ug sa Bohol.

Sa workshop nga giabagan usab sa United States Agency for International Development (USAid) pinaagi sa SURGE Project, napagawas sa mga Tagbilaranon nga buot nilang ang syudad magtutok og maghatag og suporta sa turismo nga magtamud sa kapanulondan (heritage), mag hatag og malungtarong kakitaan sa gagmay nga mamumuhunan agig lakang paglingkawas sa kawad-on.

Napagawas usab nga pangindahay nga ang matang sa turismo sa Tagbilaran kinahanglang maghatag kahigayunan sa mga industriya nga magmamugna-on, may tukmang pasilidad segun sa panginahanglan sa panahon, ug kadtong magtamud sa labing dyutay nga kadaut nga ihatag niini sa kalikopan, ug motahud sa kinaiya sa Tagbilaranon aron molungtad kini alang sa tanan.

Ang workshop nga gitambongan usab sa mga kadagko-an sa Department of Tourism sa Central Visayas gilauman nga maghipno na sa usa ka panglantaw ug damgo sa mga Tagbilarananon alang sa kaugmaran sa turismo niini.

Sa dili madugay, ipadayag na sa City Tourism Office ang output sa workshop aron kini ivalidate ug pandayan nag balaod, segun sa tinubdan sa syudad. (rahc/PIA-7/Bohol)

Gihipno sa mga representante sa mga sector sa Tagbilaran ang tourism master plan alang sa sunod nga lima ka tuig, aron kagiyahan na ang pag-ugmad sa turismo sa ganhgaang syudad sa Bohol (rahc/PIA-7/Bohol)