NGP mananum sa makaon,

magtunhay sa kalikopan  

TAGBILARAN CITY, April 25 (PIA)--Palapdan pa ang National Greening Program (NGP) ilabi na sa mga tanum pamugong sa pagkahunlak sa yuta ug mga tanum nga maghatag og pagkaon ug dugang kita sa katawhan.

Kini maoy apil sa mga nahauna nga programa nga gilatid sa bag-o nga Provincial Environment and Natural Resources Officer (PENRO) nga si Eusalem Quiwag.

Didto sa Kapihan sa PIA sa pagsaulog sa Earth Day sa miaging semana, si PENRO Quiwag mibutyag nga gawas sa iyang prayoridad nga sundon ang mga kalihukan nga gikinahanglang himoon sa iyang buhatan, iyang iwahing ngadto na sa mas dali nga mga magamit sa pagkaon, produkto ug makatabang sa kalikopan.

Ang tumong, mao nga matabangan ang kalikopan nga maghatag og mga magamit sa tawo, pasabut niya.

Subay usab sa direksyon nga gisagop ni Kalihim Gina Lopez, matud ni Quiwag nga ang Department of Environment and Natural Resources dili lamang manalipod sa mga importante nga kahinguhaan apan pagseguro nga ang mga kalihukan ug programa makahatag og dugang kita sa katawhan ug komunidad.

Partikular nga tutokan unya sa DENR mao ang kalikopan alang sa kalihukang ecotourism, saysay niya.

Niini, gipasabut niya nga mahimong madugangan ang kita ug dili na magsakripisyo pa sa kalikopan o sa kahinguhaan.

Alang sa NGP, kansang tumong mao ang pagpuno sa mga bakante ug umaw nga yuta, gawas nga himoong mas produktibo pinaagi sa pagpananum, kadtong mga klase sa tanum nga magbunga og makaon, o kadtong mahimong dali nga ikabaligya, dugang sa kanhi CENRO sa Tagbilaran.

Mogamit gihapon sa mga pamaagi sa programa sama sa pagpakunhod sa kalisud ug kawad-on, mangontrata gihapon ang DENR sa mga komunidad sa pagpananum, apan ang produkto nga gitan-aw maop ang kape, mga kahoy nga mamunga.

Hinuon, gidason sa PENRO  nga dili nila talikdan ang ilang mandu sa pagpatuman sa mga balaod nga mag-abag alang sa maayong pagdumala sa kalikopan. (rahc/PIA-7/Bohol)

Pananum nga daling kapahimuslan sa mga komunidad sama sa may bungang kahoy, mga kape ug kadtong maayong ibangga sa hulga sa nag-usab nga panahon ang isugyot sa DENR nagdto sa NGP sa mga nahibiling bahin sa umaw nga yuta sa Bohol, matud ni PENRO Eusalem Quiwag.  (rahc/PIA-7/Bohol)