State of calamity gideklara, 

dugang pundo, buhi-an sa Clarin

TAGBILARAN CITY, April 25 (PIA)--Samtang gideklara na sa Sangguniang Bayan sa Clarin ang state of calamity sa ilang lungsod, milaum si Mayor Allen Rey Piezas nga kapun-an ang ilang pundo nga magamit samtang nagpadayon ang emerhensya. 

Segun sa Section 3 sa RA 10121, o ang “Philippine Disaster Risk Reduction and Management Act of 2010,” ang state of calamity usa ka kondisyon diin adunay mass casualty, o may dagkong kadaut sa propyedad, pagkabalda sa panginabuhian, mga agi-anan, o sa normal nga panginabuhian sa katawhan sa usa ka lugar na apektado sa natural o hinimo sa tawo nga kakuyaw. 

Sa pagpanguna ni Bise Mayor Velden Aparisio, napalusot sa Sangguniang Bayan niadtong Abril 24 ang pagdeklara sa state of calamity sa lungsod, subay sa pipila sa mga tahas sa SB.

Tungod niini, mahimo na sa lungsod nga makapagawas sa mga supplemental budgets alang sa pagpamalit sa mga gikinahanglan nga supplies ug serbisyo aron kapugngan ang pagka sayang sa kabtangan ug kinabuhi. 

Gisaysay sa Section 321 sa RA 7160 nga ang supplemental budget mahimong ipasa sa panahon nga ang lugar makasinati sa panahon sa public calamity pinaagi sa paghimog mga budget realingments aron pundohan ang pagpamalit sa dugang supplies o serbisyo mga labing gikinahanglan ug indispensable aron malikayan ang dugang kadaut. 

Sa Section 324, giingon nga 5% sa mga kita sa lungsod gikan sa regular nga tinubdan tipigan isip bulto nga pundo alang sa mga galastohan nga wala dahuma, nga epekto sa kalamidad, natural man o hinimo sa tawo. 

Hinuon, kining pundo, mahimo lamang gastohon sa lugar diin adunay kalamidad nhga gideklara. 

Gawas pa niana, kadtong mga public health workers mahimo nang makadawat sa hazard pay subay sa probisyon sa RA 7506.

Dugang pa, gawas nga makakuhag dugang pundo ang usa ka lugar alang sa galastohan niini sa panahon nga gipahiuli ang epekyo sa katalagman, ikalangsang usab sa lugar ang presyo sa batakang palaliton ug serbisyo samtang kapugngan ang pagtipig niini aron ikapamaligyag mahal. 

Kahinumduman sa sa Clarin, nahitabo ang pagpanagsukli-ay sa bala sa mga bandidong Abu Sayyaf ug mga tropa sa kagamhanan. 

Ang mga bandido nga salin sa laing sikli-ay sa bala didto sa silingang lungsod sa Inabanga, maoy nakaingon nga 13 sa 24 ka barangay sa lungsod ang apektado. 

Mikabat na sa 567 ka banay ang mihiklin gikan sa 13 ka barangay, nga unang gihatagan og relief sa lungsod, sawala pa mahidangat ang tabang gikan sa DSWD. 

Ang Clarin nga may usa ka milyon ka pesos lamang ang pahat alang sa katalagman, mipahat nag una sa P800 mil niini ngadto sa iyang drug rehabilitation program, ug P200 mil na lamang ang pundo alang nga magamit sa katalagman nga sala sa Abu Sayyaf, tug-an sa mayor. 

Dugang pagkaon, mga galastohan sa pagpadagan sa operations center sa kasundalohan ug mga tinugyanang nagtubag sa kasamok sa lungsod ug pagpadagan sa mga kalihukan subay niini maoy mga nahauna nga galastuhan nga buot sa lunsgod nga tubagon. 

Sa pagdeklara sa satte of calamity, nanghinaut ang katawhan usab nga ma-abagan pa sa lungsod sa ilang mga panginahanglan. (rahc/PIA-7/Bohol)

Milaum si Mayor Allen Ray Piezas sa Clarin nga makatabang sa kadaghanan sa molupyo ang pagdeklara sa state of calamity nga magbuhi usab sa dugang pundo nga magamit sa lungsod sa nagpadayong hulga sa katalagmang hinimo lamang sa ASG didto. (rahc/PIA-7/Bohol)