Mga bandido dakpon, buhi man 

o patay, sa makasumbong, P1M

TAGBILARAN CITY, April 19 (PIA)--Nabuktot ka na bag pinangita unsaon nga makakuha kag usa ka milyon? Sayun ra, ilabi nag ikaw taga Inabanga. 

Karong hapon, mibutyag si Presidente Rodrigo Duterte nga mohatag ang kagamhanan og usa ka milyon alang niadtong tawo nga makahatag og kasayuran nga positibong maka-ingon nga madakpang patay o buhi ang bisan asa sa pito ka mga bandidong hangtud karon, nagtagotago sa mga hilit nga lugar sa Inabanga. 

Gawas sa usa ka milyon, pun-an usab sa Kagamhanang Probinsyal ang pabuya og laing usa ka gatus ka libo ka pesos sa makatumbok sa gihudhoran sa mga nakalingkawas sa pagpamomba sa mga air assets sa kagamhanan niadtong sayo sa Martes hangtud sa Miyerkules sa kaadlawon. 

Sa walay daghan pang langas, mibutho si Presidente Rodrigo Duterte sa Tagbilaran Abril 19, dungan sa pagkahikurat sa daghanang opisyales nga naanad na sa bagang pagpangandam nga hinoun matag dunay pagbisita sa Presidente.

Ginamit ang iyang personal nga oras, mipabati si Duterte sa iyang pagkiling sa Bohol sa pagsuta sa mga taho kon usa gayud ang matuud nga nahitabo sa pagpanagbagt sa mga pwersa sa kagamhanan batok sa mga bandidong Abu Sayyaf. 

Didto sa MultiPurpose Hall sa Philippine Ports Authority diin gipahimutang ang mga breifings, mismo si AFP Central Command commander General Oscar Lactao ug si General Noli Taliño ang naghatag sa mga kasayuran sa presidente ug mga sakop sa Kabinete nga nagtigum didto. 

Human sa briefings, samtang gikahinabi sa mga Bohol ug National Media ang Presidente, gibutyag niini ang tanyag nga cash ngadto sa si bisan kinsang makatabang nga makaplagan na sa mga sundawo ang mga misuway sa pagpanghasi sa Bohol. 

Ang akong mandu, mao ang pag-gun-on kanila [Abu Sayyaf], ug kadtong mga sibilyan nga interesadong moapil sa away ug pangpaningkamot, ang akong sugo, kuhaon sila, buhi man o patay. 

Hinuon usab, sayo pa niana, si Intelligence Officer sa ISAFP nga si Lt. Col. Adolfo Espuelas mipahimangno na ngadto sa kadaghanan nga kon mohatag sa mga taho, dili kadtong mga sama samga "miingon si, matud ni, kay bain kanang maong kasayurran nga imong gipaambit nagbalikbalik ra usab nga pulos walay basehanan sa kamatuoran. 

Likayi ang tsismis, pahimangno ni Espuelas, tungod kay kini mas magpalisud sa trabaho sa information analysis. 

Hinuon, tambag niya, kinahangalang tataw gayud ang kasayuran nga gipadangat: Unsay imong nakit-an, Kinsay imong nakit-an Kanus-a kini nimo makita, diin nimo makita ug ubang mga detalye nga makatabang alang sa pagpas nga pagsarap sa kamatuoran. 

Matud niya, itaho kini sa hotline sa 09054551543. (rahc/PIA-7/Bohol)