Intelligence, di palpak kay 

nasumpo ang tuyo sa ASG

TAGBILARAN CITY, April 18 (PIA)--Dili palpak nga intelligence, segun pa sa gituohan sa uban, ang nakatampo sa dugo-ong nahitabo sa Inabanga. 

Gipasabut ni Lt. Col. Adolfo Espuelas sa Intelligence Service of the Armed Forces of the Philippines (ISAFP) nga mahimo lamang nga palpak ang intelligence kon ang bahan nga gipangulohan sa napatay nga si Abu Rami, nakapamomba o nakapangidnap na.

Daghan ang misaway sa giingon nga ulahi nga intelligence reports nga misulod sa Bohol ang mga bandido nga Abu Sayyaf Group (ASG). 

Nataho sa mga tinugyanan ang presensya sa mga armadong tawo nga nakit-ang nagpa-uga sa ilang mga armas didto sa Barangay Napo, lungsod sa Inabanga niadtong Abril 10.

Sayo sa Abril 11, nakabagat sa mga sundalo sa kagamhanan ang armadong mga tawo nga misukol usab sa sinukliay sa bala nga milungtad sa halso 24 oras. 

Paglurang sa buto-buto, nabangawan ang upat ka patay nga lawas gikan sa habig sa mga government troopers ug laing lima sa habig sa mga terorista. 

Sa pag-gawas sa balita, daghan ang mipadayag sa ilang hunahuna, lakip na niini ang pagkapakyas sa intelligence network sa pagpugong nga dili makatabok ang mga bandido arong manghasi sa Bohol. 

Gitumbok usab ang pagkamatay sa mga bayaning sundalo ug pulis nga tataw nga wala na kinahanglana nga panghitabo.

Apan, dugang ni Col Espuelas, dugay na nga gipanid-an ang lihok sa grupo ni Abu Rami ug wala gayud kini maatli sa mga tinugyanan sa kagamhanan. 

Daghan pa gihapon ang naglalis kon unsa gayud ang matuod nga tumong sa grupo sa Bohol, nga halayo sa lugar nga sarang pagahimoan sa mga armadong grupo sa pagpanghasi. 

Kasagaran mituo nga mangidnap sila, apan ang kagamyon sa mga nailog nga sakayan, magtug-an nga dili na halos makarga kon may hostage pa. 

Hinuon, may nakaplagan ang mga otoridad nga mga ganit sa paghimo og improvised explosive device o bomba, didto sa balay diin mihimo sa pagdepensa ang pipila ka sakop sa bandido. 

Segun pa sa mga tinubdan sa militar, nagtuo sila nga ang pag-abut sa mga bandido sa Bohol, usa ka lakang sa pagpataas sa ranggo sa mga bandido. 

Hinuon ang pagkapatay sa ilang lider nga si Abu Ramu ug ang ilang bomb expert sa sinukliay sa bala sa Napo, nakapakgang sa laraw sa mga armado. 

Gani, positibo si Col Espuelas nga bugtong tumong karon sa mga pito ka sakop sa mga bandido, mao ang pag-ikyas sa kamatayon ug kon mahimo, ang pag-uli sa Mindanao. 

Apan, matud sa mga militar ug otoridad sa Bohol, nalibutan na ang lugar nga gitagu-an sa mga bandido ug kay halayo sila sa hinabang, dili na magdugay nga molugak kinig maabtan na sa kamut sa balaod. (rahc/PIA-7/Bohol)

Dili palpak ang intelliegnce kay og palpak pa, nakapamomba o nakapangidnap na unta sila, matud ni Lt Col Adolfo Espuelas sa mga sakop sa PPOC. (rach/PIA-7/Bohol)