Bohol andam na 

sa ASEAN 2017

TAGBILARAN CITY, April 17 (PIA)--Andam na ang Bohol samtang all systems go na usab ang Department of Trade and Industry (DTI) sa pagdawat sa mga sakop sa Association of South East Asian Nations (ASEAN) nga maghimo sa ilang tigum dinhi sa Bohol. 

Kini bisan pa sa hulga nga dala dinhi sa mga bandidong misuway og tanum og kaguliyang sa Bohol. 

Didto sa katapusan tigum sa mga tinugyanan sa Bohol ug sa National Organizing Committee (NOC), lakip na ang DTI nga maoy host sa mga tigum dinhi, gibutyag ni retired general ug ASEAN consultant Josephus Angan nga andam na ang tanan alang sa tigum sa ASEAN trade nga himoon dinhi sa Panglao sa Abril 18-21. 

Mismo si Gob Edgar Chatto, kinsa maoy executive Committee Chair sa ASEAN Bohol mitaho nga napaandam na ang tanan ug mokabat sa dul-an sa 4,000 ka mga tawo ang lakip sa maghatag og dugang seguridad sa Bohol sa panahon nga nia ang mga bisita sa 10 ka nasud nga sakop sa ASEAN. 

Magsugod og abut ang mga delegados sa ASEAN sa Abril 18 sa pantalan sa Tagbilaran ug sa tugpahanan sa Tagbilaran, diin sugaton sila sa mga kalingawan, gamay nga pamainit ug abiabihon sa mga sakop sa lokal nga opisyales sa Bohol.

Hugot nga seguridad ang maabtan sa mga sakop sa ASEAN samtang ipaneguro usab sa mga tinugyanan nga walay dautang mahitabo samtang ania ang mga bisita. 

Matud sa DTI, daghang mga delegados ang moanhi sa labing unang higayon ug nanghinaut sila nga ang impresyon nga dalhon sa mga bisita sa pag-uli sa ilang tagsatagsa ka nasud, pulos mga maayong kasinati-an, aron mobalik og mosuroy sa Bohol. 

Samtang himoon ang tigum sa mga sakop sa ASEAN didto sa Hennan Resort sa Panglao, may nasud nga mipili nga adto mo-okupar sa laing resort sa Panglao. 

Amy tigum usab nga adto mahitabo sa Amorita samtang may kalihukan ang ASEAN nga adto himoon sa South Palms Resort, segun sa ASEAN NOC. 

Kasamtangan usab nga gihipno sa mga kalungsuran ug sa syudad sa Tagbilaran ang paglimpyo sa mga agi-anan sa mga delegados sa ASEAN samtang gipanghinlo-an sa DPWH ang mga kaagi-an aron walay mga trabahanteng naghimog pag-ayo sa mga kadalanan nga makapahinay sa dagayday sa mga sakyanan nga giluwanan sa mga sakop ug delegado sa ASEAN paingon sa Panglao. (rac/PIA-7/Bohol)

Gideklara ni Gob Edgar Chatto nga andam na ang Bohol sa pag-abut sa mga delegados sa ASEAN kinsa maghimo sa pipila nila ka tigum sa patigayun dinhi sa Bohol. Si Chatto  nanguna sa katapusang tigum sa NOC ug Bohol didto msa PPA multi-purpose Hall Abril 17.  (rahc/PIA-7/Bohol)