Mga bandidong nakaipsot,

wa nay laing kapadulngan

TAGBILARAN CITY, April 17 (PIA)--Wala nay kapadulnga ang mga bandido ug kay nagdagway ug mga isda nga namad-an sa tubig, misalig ang mga tinugyanan sa militar ug kapolisan sa Bohol nga dili na magdugay makab-ot na sa taas nga kamot sa balaod ang mga armadong bandido nga manghasi na unta sa Bohol. 

Pipila pa ka sakop sa bandidong Abu Sayyaf nga nisuway ug sulod sa Bohol ang kasamtangang nagtagotago human nakuha sa mga tinugyanan sa kagamhanan ang ilang giilang lider, pipila ka mga kauban lakip na ang giingong eksperto sa paghimo og bomba, ang ilang kasakyan sa pagsibat ug ang ilang mga ganit. 

Matud ni Army Lt. Col Adolfo Espuelas, sa paglahutay sa sinukli-ay sa bala, sa pipila na ka adlaw nga nagtagotago ug naglikay nga makit-an sa mga sundawo nga nangita, tataw nga wala nay igong gahum nga ikalahutay pog sukol ang mga bandido. 

Nakabagat sa hini-usang pwersa sa militar ug kapolisan ang mga bandidong giingong sakop sa Abu Sayyaf didto sa Barangay Napo Inabanga niadtong Martes sa sayong buntag, ug milanat ang sinukli-ay sa bala sa pipila ka oras. 

Gani, tungod sa kamaayo sa posisyon sa mga bandido, nakahimo pa kini pagsukol pinaagi sa sniper operations diin upat ka sakop sa pwersa sa kagamhanan ang napatay. 

Sa paghuman sa sinukliay sa bala, upat ka sakop sa mga bandido, duha ka sibilyan nga tag-iya sa balay nga gipuy-an sa mga bandido, ang nakaplagan usab nga patay. 

Giingong misulod sa suba sa Inabanga ang mga bandido uban sa usa ka taga Inabanga nga recruit sa ASG gamit ang tulo ka gagmay nga barotong kinatigan. 

Segun sa kikataho, dili molapas sa 12 ka tawo ang nakasulod, lakip na niini ang Bol-anon nga si Joselito Meloria. 

Human sa sinukliay sa bala, unom o pito ka sakop sa mga bandido ang naka-ipsot, apan positibo si Gob Edgar Chatto ug mga militar nga wala kini makagawas sa naglibut nga pwersa sa kapolisan ug militar. 

Tungod sa gubat, tulo ka bandido ang samaran, ug may bitbit kining upat ka M16, ang uban adunay grenade launcher, apan kasagaran niini, wala nay ikasukol nga bala, matudni Col Espuelas. 

Makalahutay ang Abu Sayyaf sa pagpakigharung sa militar kon sila tua pa sa lugar nga daghan silag tigsuporta, apan wala silay mapaabut sa mga taga Bohol, dugang ni Espuelas. 

Gani, dala sa nakuha nga mga kagamitan sa mga bandido didto sa balay nga ilang gisak-an, may timailhan nga may plano silang mamomba, apan wala nay kapasidad ang mga bandido human nakuha ang ilang gamit ug napatay nga si Abu Sufyan. 

Si Abu Sufyan ang giilang bomb expert sa grupo. 

Tungod niini, matud ni Col Espuelas, mas prayoridad sa mga bandido ang moipsot kay sa mangita pag kagubot. 

Niini, padayon ang panawagan ni Gob Edgar Chatto ug sa mga tinugyanan sa militar ug kapolisan sa mga Bol-anon nga isumbong ang mga katingad-an nga mga tawo nga mahimong mangayo'g pagkaon ug mga direksyon sa mga agi-anan. (rahc/PIA-7/Bohol)

WALA nay kapasidad ang mga bandido nga mosulok og lahutay nga sinukliay sa bala, matud ni Lt Col Adolfo Espuelas, ug mahimong sa dili madugay, hi-apsan ra kini sa mga tinugyanan. Niini, miawhag ang mga tinugyanan sa Bohol nga isumbong ang mga bag-og dagway nga mahimong karon, gipanggutom ug nagping-it sa kasakit sa mga samad nga nahiaguman sa panagbangi sa Inabanga.  (rahc/PIA-7/Bohol)