Bohol isip sentro sa climate 

change mitigation, gipalig-on

TAGBILARAN CITY, May 22, (PIA)--Sa labing bag-ong kaugmaran, gipalig-on sa Bohol ang iyang stratehikanhong posisyon isip nanguna sa Climate Change Mitigation Capital sa Pilipinas. 

Kini maoy gipahayag ni WeGen Distributed Energy Philippines Chief Executive Officer Atty Julito Sarmiento, atul sa pagtugyan sa bag-ong 39 kilowatt peak nga solar power facility didto sa isla sa pamilacan dili pa dugay. 

Ang WeGEN, ang labing bag-ong player ug provider sa renewable energy sa Pilipinas mitukod inabagan sa katilingban sa Pamilacan, sa solar power facility pinaagi sa pagkolekta sa enerhiya sa adlaw pinaagi sa 135 ka photo voltaic solar cells ug pagtigum niini sa 60 ka storage batteries aron magamit sa mga taga isla. 

Pinaagi sa usa ka proyektong gitawag og "Kahayag sa Pamilacan," hatagan og alibyo sa WeGen solar energy system ang katawhan sa Pamilacan pinaagi sa 8 ka oras nga limpyo ug renewable nga koryente nga ikapares sa limpyo ug gaan sa kalikopan nga pangturismong kalihukan sa Dolphin ug Whale Watching. 

Ang 8 ka oras nga limpyong tinubdan sa koryente maoy labing daku nga gigamit alang sa usa ka komunidad sa Bohol, ang kasagaran niini may tinagsa ug ginagmay nga gamit alang sa pipila ka panimalay. 

Sa Pamilacan, makagamit ang 329 ka panimalaya sa koryente sa sugod sa alas 8:00 sa buntag hangtud sa alas 4:00 sa hapon, ug dayon mopuli na usab ang koryente nga gikan sa fossil fuel pinaagi sa National Power Corporation nga Diesel Power generator hangtud sa tungang gabii.

Matud ni Atty Sarmiento, nalabangan sa Bohol ang labing kusog nga linog sa 2013 ug nahimo gani kining sumbanan sa ubang lugar sa pagtubag sa mga panginahanglanon sa panahon sa katalagman. 

Wala magdugay human sa linog, na-igo usab ang Bohol sa super bagyo nga si Yolanda ug natala ang labing gamay nga kadaut human sa maayong pagdumala sa disaster mitigation. 

Ang Bohol usab nag-una sa mga lalawigan sa palisiya kabahin sa kalikopan ug sa limpyo ug malungtarung kaugmaran, matud pa sa WeGen. 

Ning bag-o lamang, natukod sa Bohol ang labing unang proyekto sa WeGen nga limpyo ug renewable nga koryente, nga mahimong labing dako nga off grid nga proyekto sa tinuok nasud. 

Tungod niini, misalig ang WeGen nga napalig-on nila ang pangandoy sa Bohol nga ilhong Climate Change Mitigation capital sa nasud. (rahc/PIA-7/Bohol)

Gipindot nila ni BOHECO 1 Manager Dino Roxas, Pamilacan barangay Chairman Crespo Valeroso ug WeGen Philippines CEO Atty Julito Sarge Sarmiento ang switch nga nagpalig-on sa pag-angkon sa Bohol sa katungod nga mamahimong nag-unang sentro sa Climate Chnage Mitigation sa nasud atul sa pagbukas sa 39KWP solar energy facility sa Pamilacan. (rahc/PIA-7/Bohol)