5 ka flight destinations 

abli gikan sa Tagbilaran

TAGBILARAN CITY, June 8, (PIA)--Paabuta ang mas bibo nga tugpahanan sa Tagbilaran sa sunod nga mga semana, kini tungod sa nagkadaghang eroplano ug nagkadaghang adtoanan ang nabuksan. 

Subay usab niana, mas daghan na nga pasahero'g turista ang maka-abut sa Bohol ug Bol-anong maka-abut sa 5 na ka destinasyon: lokal ug international, butyag ni Civil Aviation Authority of the Philippines (CAAP) Tagbilaran Chief Engr. Dennis Aures. 

Kanhi, Manila lamang ang gialagaran nga komersyal rota gikan sa Tagbilaran Airport. 

Gawas nga madugangan ang destinasyon nga mahimong abton sa mga eroplanong moari sa Tagbilaran, adugangan na usab ang mga serbisyo pinaagi sa labing una nga international flight nga mag-alagad sa mga Bol-anon ug mga turista nga buot mosuroy ug maglulinghayaw sa Bohol.

Gikan sa Tagbilaran airport, makahimo na ang mga Bol-anon nga moadto sa Manila, Clark, Mactan Cebu, Cagayan de Oro ug sa Incheon South Korea. 

Gikan sa kasamtangan nga duka ka byahe sa Philippine Airlines (PAL), madugangan kini og usa dala sa buksan nga international flight matag adlaw gikan sa Tagbilaran paingon sa Incheon Korea sugod Hunyo 22.

Mogikan ang PAL sa Tagbilaran paingon sa Incehon Korea matag alas 5:20 sa hapon samtang mobalik sa Tagbilaran gikan sa Incheon sa alas 2:30 sa kaadlawon ug moabut sa Tagbilaran sa alas 6:00 sa buntag. 

Dayun gikan sa Korea-Tagbilaran, molupad na usab ang PAL paingon sa Clark sa Tarlac sa alas 6:40 sa buntag ug mobalik sa Tagbilaran gikan sa Clark sa alas 3:00 sa hapon dili pa mogikan na usab sa Korea.

Ang Cebu Pacific (CebPAc), laing kompanya nga nagtanyag og Airbus nga serbisyo sa Tagbilaran ngadto sa Manila mipakunhod na hinuon sa ilang byahe ngadto sa duha na lamang sugod niadtong Lunes, matud ni Engr. Aures 

Kasagaran kini mahitabo kon momenos na usab ang tingsakay, dala sa opisyal nga pagkahuman sa peak season, dugang sa hepe sa CAAP. 

Apan, ning bag-o lamang, nagbukas usab ang CebPac sa Tagbilaran nagdto sa Cagayan de Oro, tulo ka higayon sa usa ka semana, dugang sa CAAP. 

Tulo pa gihapon ang byahe sa Air Asia sa rota nga Tagbilaran-Manila. 

Sa laing bahin, sugod sa Hunyo 19, maghimo nag regular nga byahe ang usa ka gamay nga eroplano alang sa rota nga Tagbilaran Mactan Cebu. 

Gani, matud sa tag-iya sa AirJuan nga si John Gutierrez, mahimo na sila ngamagsugod og byahe sa Tagbilaran gikan sa Mactan Cebu sa tulo ka higayon matag semana sa dili pa ang ilang regular nga duha ka byahe matag adlaw. 

Niini nga kalambu-an, gawas sa mga chartered flights paingon sa Tagbilaran nga dili regular, may adlaw nga may 10 ka eroplano nga motugpa og mogikan sa Tagbilaran ngadto sa Manila, Clark, Cagayan de Oro, Cebu ug sa Incheon Korea. 

Kini samtang gipadali sa CAAP ang pagpahiluna sa extension sa Airport spaces dala na sa dugang panginahanglan sa pag-bukas sa international flight. 

Buhatan sa Bureau of Customs, Bureau of Immigration ug Bureau of Health and Quarantines ang ipahiluna sa Airport aron modawat og magproseso sa international flights, segun pa sa CAAP. (rahc/PIA-7/Bohol)

Si CAAP chief Engr Dennis Aures nakig-estorya sa mga tourism stakeholders sa Bohol sama nila Josephine R Cabarrus (Bohol Tourism officer), ug Siobel L Ligalig (City Tourism Officer), Fiel Gabin (City Information Officer) ug Sarah Dejaresco (tour agent) sa paglusad sa AirJuan nga lupad paingon sa Mactan ning semanaha. (rahc/PIA-7/Bohol)