Eroplano sa AirJuan magbukas 

na's byaheng Tagbilaran-Cebu

TAGBILARAN CITY, June 7, (PIA)--Usa ka nag-unang kompanya sa eroplano nga makapatugpa sa dagat ang mipakita'g interes nga moalagad sa ruta nga Tagbilaran Bohol ngadto sa Sugbo, kaduha ka lupad matag adlaw sugod Hunyo 19. 

Kini gitan-aw sa mga tigpaniid nga maayong kaugmaran samtang nagkadaghan ang mga turista nga dili makasakay sa mga fastcraft nga magbyahean sa Tagbilaran. 

Gawas pa, sa 20 minutos nga lupad sa Sugbo, kini ang labing sayun nga paagi nga makaapas sa connecting flights ang mga turista'g negosyante nga matanggong sa panahon nga may dautang tempo ug mobawod ang dagat nga walay barkong palargahon.

Ang Air Juan, ang nag-unang kompanya sa eroplano nga nagtanyag sa paspas ug walay hasol nga transportasyon sa kahanginan ngadto sa mga pangturismong destinasyon ug ka islahan sa Pilipinas nga dili na economically viable aron sudlan sa mga dagkong eroplano, mopalapad sa ilang mga giserbisyohan sa ilang pagsulod sa Bohol, matud ni AirJuan President John Gutierrez. 

Gani, aron mailhan ang ilang eroplano, gibutyag sa Pinoy nga negosyante nga mahimong mahimo una sila sa tulo ka lupad matag semana nganhi sa ruta nga Tagbilaran-Mactan-Tagbilaran sa dili pa ang Hunyo 19. 

Gamit ang Cessna Grand Caravan nga amphibian, usa ka bag-ong eroplano nga napalit sa kompanya, and serbisyo sa AirJuan sa Tagbilaran alang sa siyam ka pasahero nga mahimong magbitbit sa libre nga 10 ka kilo nga cargo.

Ang mga eroplano sa AirJuan, may siyam ka lingkoranan, luag nga kabinaug kapasidad nga makalupad gikan sa mugbo nga tupahanan, samtang ang mga pasahero mahimong makalingkawas sa tag-as nga pila ilabi na sa mga dagkong airport. 

Tungod sa dali ug walay hasul nga panakayan, mipadayag si MPaolo Misa, AirJuan Marketing head nga naas 95% ang pagkatunong sa AirJuan sa oras nga nakaschedule. 

Dugang ni Gutierrez, kasagaran, ang suliran sa ilang pagkadelatar sa byahe naa gayud sa pagdumala sa mga tugpahanan, apan talagsaon ra kini sa AirJuan. 

Ang matag pasahero mahimong magkarga pa sa lapas sa napulo ka kilo apan kini may bayad na.

Sa inaugural flight gikan sa Tagbilaran libot sa isla sa Panglao, gisuwayan sa mga piloto nga sila Ian delos Reyes ug Mark Griffin ang pagtugpa sa Alona Beach dayon lupad og balik. 

Hinuon, lain nga Cessna Caravana ng gamiton alang sa Tagbilaran Mactan nga rota nga serbisyohan, dugan ni Paolo Misa, AirJuan Marketing Head. 

Gutuyo sa AirJuan paggamit ang Cessna nga seaplane configuration aron ikapakita ang kapasidad sa eroplano nga moalagad sa mga bisita nga buot na nga moderetso sa mga resorts nga dili na mahasul nga moagi sa airports, dugang ni Misa. 

Sa introductory price nga P1,500, daghan ang mibutyag nga ang plete labaw lang og dyutay sa business class sa fastcraft nga nag-alagad ruta nga tagbilaran Cebu. 

Hinuon, matud ni AirJuan President Gutierrez, kon mapuno kanunay ang siyam ka lingkoranan sa matag byahe sa eroplano, hayan dili na patas-an sa tagdumala ang pletehan.

Ang AirJuan una na nga nag-alagad sa Subic, Baler Aurora, Balesin Quezon, Boracay, Coron, Busuanga Ug El Nido Palawan, Puerto Galera sa Batangas, Marinduque ug Mamburao hangtud sa pagbukas sa Cebu niining bag-o lamang. (rahc/PIA-7/Bohol)

Wa kasakay sa barko kay walay gipalarga? Nia na ang AirJuan, eroplanong Cessna Caravan nga mobyahe paingon sa Sugbo sulod sa 20 minutos, gikan sa tagbilaran sa plete nga sinugdang tanyag sa P1,500. Sayun, dali ug way hasol nga tabang alang sa turismong potensyal sa Bohol. (rahc/PIA-7/Bohol)