Dili ikahatag sa PSA ang 

dokumento sa di tag-iya

TAGBILARAN CITY, June 7, (PIA)--Sa pagpanalipud sa batakan nga katungod og pribasiya sa usa ka tawo, nagpagawas og Memorandum ang Philippine Statistics Authority (PSA) nga maglatag sa palisiya sa pag-hatag o pag-release sa mga personal nga dokumento. 

Pinaagi sa Office Memorandum No 2017-50, gilagda na sa PSA, nga kanhi nailhan sa pangalan nga National Statistics Office (NSO) nga dili nila mahimo irelease ang mga dokumento nga magtanyag sa identity sa usa ka tawo ngadto ni bisan kinsa. 

Sa mga dokumento, gipasabut sa PSA pinaagi ni National Statistician ug Civil Registrar General Lisa Grace Bersales ang Certificate of Death, Certificate of Marriage, Certificate of no Marriage ug Advisory on marriages. 

Matud sa PSA, misuporta sila sa palisiya sa kagamhanan sa pagpanalipud sa batakang katungod sa pribasiya dungan sa pagpasa sa Republic Act 10173 o ang Data Privacy Act sa 2012. 

Subay niini, gipahibaw nang daan sa PSA nga dili sila makatugot nga itunol na lamang ang mga nahisgutang dokumento nga makatumbok sa identity sa usa ka tawo, kon wala magtaban sa iyang pagtugot. 

Dugang sa PSA, ang pagtugot, kon himoon man ugaling sa tag-iya sa dokumento, kinahanglang isuwat sa kinamot, electronic o sa paagi nga girecord pinaagi sa tingug. 

Kon walay pagtugot, irelease lamang sa PSA ang mga nahisgutang dokumento sa tag-iya mismo, sa iyang kapikas, ginikanan, direktang sumusunod, guardian o institusyon nga gihatagan sa legal nga katungod ilabi na kon ang tag-iya sa dokumento, menor de edad. 

Hinuon, itugyan sa PSA ang dokumento ngadto sa sakto nga opisyal kon ang dokumento gikinahanglan sa administratibo, judicial ug uban pang opisyal nga proceedings aron ilhon ang identity sa usa ka tawo, segun sa memorandum.

Kon ugaling ang tag-iya sa dokumento patay na, irelease kini ngadto sa labing duol nga paryente. 

Subay niini, awhag sa PSA Bohol pinaagi ni Provincial Statistician Jessamyne Anne Alcazaren ngadto sa mga buot mokuha sa ilang mga dokumento nga gipangayo nga personal nga mokuha niini gikan sa PSA. 

Matud sa PSA Bohol pinaagi sa ilang information officer Emmanuel Galab, daghang kaso dungan sa mga Mobile Passporting ang ilang balibaran ang mga mo-claim sa mga gipaproseso nga dokumento, subay ning rason. 

Seguroha nga kon dili ikaw ang tag-iya sa dokumento, may ikapakita kang dokumento nga mag-ila kanimo nga kabanay sa tag-iya, o kuha daan og kasuwatan nga legal nga magtugot kanimo nga mokuha sa dokumento, tambag ni Galab. (rahc/PIA-7/Bohol)

Si PSA Bohol Statistician Jessamyne Anne Alcazaren mipahibalo sa palisiya sa pagdili sa PSA paghatag sa mga dokumento ngadto sa dili mga tagtungdan, subay sa Data Secrecy Act ug sa batakang katungod sa tawo. (PIABohol)