Paggamit sa selpon samtang 

Nagdrive, dakpon sa LTO

TAGBILARAN CITY, June 6, (PIA)—Pasensya kon masakpan.

Kini maoy pintok nga pahimangno sa Land Transportation Office (LTO) ngadto sa mga nagmaneho sa mga sakyanan’g de makina sa kadalanan samtang nag-gamit sa mga kahimanan sa komunikasyon sama sa cellphone, tablets, e-book ug mga computing devices. 

Kini bisan pa nga kasamtangan pang gisuspenso sa kagamhanan ang pagpatuman sa bag-ong napalusot nga balaod nga Republic Act 10913 o mas nailhan nga Anti Distracted Driving Act. 

Matud sa LTO Bohol pinaagi ni Information Officer Florencio Balazuela, bisag suspendido pa ang RA 10913, ang paggamit sa cellphone nasukip nan nga daan sa Land Transportation and Traffic Code of the Philippines, o Republic Act 4136. 

Kahinumduman nga ang Department of Justice (DOJ) mipatin-aw na pinaagi sa us aka advisory nga ang RA 4136 naghisgut na sa reckless driving diin gisukip ang paggamit sa mga kahimanan samtang nagmaneho ang driver nga maoy makabahin sa iyang atensyon ug makaangin sa disgrasya. 

Matud sa DOJ, lakip sa reckless driving ang kusog nga pagpadagan sa sakyanan, nagmaneho nga hubog ug ang pagmaneho nga nga hulga sa kinabuhi ug kabtangan sa uban. 

Segun sa balaod, ang reckless driving mao ang pagpadagan sa motor vehicle nga wala maggamit sa makatarunganon nga pagbantay sa kalapdon sa dalan, sa dagan sa trapiko, mga tungason, eskina, likolikong dalan, ug uban pang kahimtang sa dalan, panahon, nga mao na hinuon ang rason nga maangin ang uban. 

Gipasabut sa DOJ nga sa matag higayon nga magpadagan sa sakyanan og makasupak sa balaud sa trapiko og lagda, nga magbutang sa peligro sa uban kay nabahin ang iyang atensyon, kini nagpasabut nag reckless driving. 

Daan na nga naa na ang reckless driving, ug kana maoy gamiton sa LTO sa pagpanakop sa mga makasupak niini. 

Kon madakpan, momulta ang hingtungdan sa P1,000 sa unang pagkasupak ugang LTO mag-embargo sa lisensya dungan sa pagtunol sa Temporary Operator’s Permit (TOP). 

Gani, segun sa suspendidong balaod, dili gihapon tugotan ang driver sa paggamit sa mga nahisgutang kagamitan sa komunikasyon sama sa cellphone, bisan kon mihunong na ang sakyanan dala sa puwa nga traffic lights. 

Hinuon, dili dakpon kadtong naggamit sa selpon kon kini nagtawag ug tabang ngadto sa mga tinugyanan sa balaod, sa mga bombero, medical personel aron pagresponde sa disgrasya, segun sa balaodnon’g gipaundang pa ang pagpatuman. (rahc/PIA-7/Bohol) 

Dakpon og patawan sa LTO ang si bisan kinsang drive nga nagmaneho sa sakyanan nga migamit sa cellphone subay sa RA 4136 o ang Land Transportation and Traffice Code, matud ni LTO IO Florencio  Balazuela. (PIABohol)