Panudlo batok katalagman, 

Dad-on ngadto sa barangay 

TAGBILARAN CITY, June 6 (PIA)—Dili pa igo ang pagsibya sa mga panudlo paglikay sa katalagman nga gipatik sa lungsod sa Inabanga sa ilang facebook account aron ingnon nga nabuhat na nila ang angayang buhaton.

Human sa duha ka adlaw nga bansay sa Basic Broadcasting nga gitanyag sa Philippine Information Agency didto, gipadayag ni Municipal Disaster and Risk Reduction Management Officer Rodolfo Socorin nga dalhon nila ang bag-ong katakus ngadto sa kabarangayan sa lungsod. 

Kahinumduman nga ang Inabanga usa sa mga lungsod sa Bohol nga may dako nga risgo sa pag-igo sa mga nagkadaiyang katalagman. 

Pananglit, sa 55 ka barangay sa lungsod, 29 niini ang naas baybay o tampi sa suba nga may kasinati-an na sa pag-awas, pagbaha ug paglunop. 

May 5 ka barangay usab ang lungsod nga naa sa bukana sa suba sa Inabanga ug apektado na gani sa nagkataas nga taub sa dagat. 

Laing kabarangayan sa lungsod ang direktang apektado sa linug ug wala pa kompleto nga maka-bangon hangtud karon. 

Ang epicenter sa devastating nga linug sa 2013, didto sa Anonang ug may pagkalutak sa yuta nga midagan unom ka kilometro paingon sa Barangay napo, nag apektado usab sa pag-gubat sa mga sakop sa Abu Sayyaf. 

May mga barangay usab ang lungsod nga nahimutang sa mga tiilan sa pangpang ug mga bungtod nga may risgo sa pagdahile sa yuta. 

Ug bisan pa sa mga pahimangno nga gipakatap sa lungsod, daghan ang mga komunidad nga nagdumile sa pag-hiklin tungod kay wala na usab silay laing kapadulngan. 

Tungod niini, ang mga panudlo batok sa katalagman ug pagkunhod sa epekto niini, gihimo na pinaagi sa electronic social cards ug video clips nga gisibya sa social media. 

Apan mibutyag si Mayor Josephine Socorro Jumamoy nga angayan nga makat-on ang mga tigpasiugda sa pagpakatap sa panudlo nga suheto sa mga pamaagi sa pagsibya, maong iyang gipatawag ang bansaybansay.

Human sa bansay, gilaraw sa lungsod nga adtoon ang mga komunidad nga naa sa risgo, aron didto ipanudlo ang mg buhatonon kon may katalagman. 

Kini, gipasabut usab ni Kagawad Jose Jono Jumamoy nga sinugdanan lamang sa mas dako pa nga pagpakatap sa dugang panudlo ug kasayuran nga himoon pinaagi sa linawas nga paghisguthisgut nga adto himoon taliwala sa komunidad nga nameligro. (rahc/PIA-7/Bohol)

Risgo sa katalagman sama sa dagkong bawod nga mibanlas sa pantalan sa lungsod ang apil sa gipangandaman aron ilikay ang mga komunidad sa epekto niini. Human sa broadcasting training, ang mga mitapos sa bansay, maoy modala sa kasayuran ngadto sa komunidad pinaagi sa buhing paghisgut, laraw ni Mayor Josephine Socorro Jumamoy. (PIABohol)