Sobra's 19 kilos kinatibuk-ang 

drugas na ang nasakmit - PNP

TAGBILARAN CITY, June 8, (PIA)--Sa motoo mo og sa dili, mikabat nag 19 ka kilo nga shabu ang nahipos sa tibuok Central Visayas sukad nasugdan ang kampanya batok sa ilegal nga drugas niadtong Oplan Double Barrel sa Hulyo 1, 2016 hangtud karon. 

Ug segun sa Dangerous Drugs Board (DDB), kini nagkantidad na'g P224,695,600 kon nabaligya pa sa kadalanan. 

Dugang pa niini, dul-an sa usa ka milyon na ka kabalayan ang gi-toktok (TOK) sa mga kapolisan aron hangyoon (HANG) ang mga molupyo na gikatahong migamit sa ilegal nga drugas sa pag-undang na, butyag ni Deputy Director for Administration sa Region 7 Police Superintendent Julius Cesar Gornez. 

Didto sa labing bag-o nga pagtaho sa Police Regional Office sa kahimtang sa kampanya sa ilegal nga drugas, gitaho usab nga tulo na ka hugna sa kampanya ang gipangunahan sa kapolisan agi og suporta sa Philippine Drug Enforcement Agency (PDEA). 

Ug sahi sa kasagarang nahibaw-an, dili sa unang hugna, o sa oplan Double Barrel nasakmit ang labing daghan nga ilegal nga drugas. 

Napakita sa gigamit sa kapolisan sa Rehiyon nga Geographic Information System-Based Crime Analysis (GISBCA), nga mikabat sa 5 ka kilo ug .010 gramos ang nasakmit sa mga tinugyanan sugod Hulyo 1 ngadto sa pagtak-op sa Double Barrel sa Octubre 25.

Halos doble usab ang gidaghanon sa nasakmit sa kapolisan dihang gipatuman ang Double Barrel Reloaded (DBR) sugod Marso 1, 2017 ngadto sa Mayo 23. 

Matud ni Superintendent Gornez, 9 ka kilo og 393 ka gramos ang kinatibuk-ang nakuha sa mga tinugyanan sa kagamhanan sa ilang kampanya sa DBR. 

Sa kadaghanon, matud ni Supt Gornez, kinsa maoy mitaho alang kang PCSupt Noli Taliño, mikabat sa 40, 830 ka pakete ang nakuha sa mga tinugyanan gikan sa nagkadaiyang operasyon sa kapolisan sa Central Visayas sulod sa napulo pa ka buwan nga kampanya. 

Sa 920,648 ka kabalayan nga na TOKHANG, 107, 714 ka tawo ang boluntaryo nga mingtahan ug mipabati'g pagtul-id sa ilang salawayong buhat samtang 7,695 usab ang nadakpan. 

Ug sukwahi sa gipatuo nga daghan ang nangamatay sa kampanya sa ilegal nga drugas, 173 lang sa mga gikataho ang giangkon nga napatay sa kapolisan sa rehiyon. Kini usab tungod kay mipakita's pagsukol samtang gihimo-ag operasyon. (rahc/PIA-7/Bohol)