Bata'ng di kagakus sa driver 

di na kasakay sa motorsiklo

TAGBILARAN CITY, June 13, (PIA)--Aron subayon ang mas makaayo nga lakang pagpanalipod sa kaluwasan sa mga pasahero ilabi na sa mga kabataan, gipatuman sa Department of Transportation (DOTr) ang Republic Act 10666 o ang balaod nga naghatag pagpanalipud sa kabataan nga sakay angkas sa mga motorsiklo.

Ug sa panahon sa pagbukas sa klase, dili tiaw ang kahingawa sa mga ginikanan nga nahimo nang nasaddan ang maghatud sa mga bata sa tunghaan angkas sa motor.

P3 mil, P5 mil ug P10 mil ang silot sa driver nga magpadagan sa motorsiklo nga makasupak sa Section 3 o sa prohibisyon sa balaod, segun sa section 8 nga natala usab sa Implementing Rules and Regulations niining nahisgutang lakang.

Pinaagi sa Children's Safety on Motorcycles Act of 2015, gimando na sa balaod nga did-an ang pagmaneho sa motorsiklo subay sa mga pangpublikong dalan ilabi na kon may daghang sakyanan, kusog nga dagan kon magpasakay og bata, ug kon may kusog nga bul-og sa sakyanan.

Hinuon, tugotan sa Land Transportation Office (LTO) ug sa mga gi deputize niini, kon ang tiil sa bata, makatunob sa standard nga tumbanan sa sakyanan ug ang kamot niini kaya na nga mogakus gunit sa hawak sa nagmaneho.

Did-an usab ang kabataang ang edad ubos pa sa 18 sa pag-angkas sa motorsiklo kon wala kini suot nga standard protective helmet o protective gears nga gitumong sa balaod.

Alang sa standard helmets, pangitaan gihapon sa LTO ug sa mga deputized agents niini ang helmet nga compliant sa specifications nga giluwatan sa Department of Trade and Industry (DTI).

Una na nga gibutyag sa DTI nga kadto lamang helmets nga nakapasar sa ilang Bureau of Product Standards ug nagtakin sa Import Commodity Clearance (ICC) sticker ang mahimong legal nga magamit.

Niini, daghang katawhan ang mireklamo sa ka-estrikto sa balaod subay niini.

Matud pa sa usa ka amahan, nakasabut siya sa tumong sa balaod apan ang pagpasakay sa motorsiklo lamang ang bugtong kasayon nga iyang ikahatag sa iyang mga anak.

Matud niya, apike siya sa paghatag pamasahe ug dili usab niya kaya nga magpalit og duha ka helmet pa alang sa iyang duha ka bata nga gagmay nga naa pa sa elementarya.

May misugyot usab nga patas-an na lang ang tumbanan sa motorsiklo aron maka-abut ang bata apan ang LTO mibutyag nga ilang tan-awon ang standard nga pagkataud sa factory ug mao kini sundon.

Gipatuman ang balaod kabahin sa Children's Safety sa Motorsiklo niadto pang buwan sa Mayo. (rahc/PIA-7/Bohol)

Aron kalikayan ang mas daghang problema, gidid-an na ang mga driver sa motorsiklo nga mopasakay og bata nga dili makaabut ang tiil sa tumbanan ug dili makagakus sa driver samtang dakpon gihapon sa LTO ug deputized agents kon ang nagsakay walay helmet nga isuot subay sa Helmet Law. (Hulagway: motorcyclecruiser.com)