Tsansa mahimong BPO hub, 

nasuportahan sa ASEAN

TAGBILARAN CITY, June 13, (PIA)--Ang mas libre nga pagsulod sa mga mamumuo sa mga nasud nga sakop sa ASEAN Economic Cooperation (AEC) magtanyag sa Pilipinas sa lapad nga kahigayunan sa pag-ugmad sa kaugalingon isip international nga sentro sa negosyo ilabi na sa business process outsourcing (BPO).

Kini maoy usa sa mga nakita nga kaayuhan nga dala sa pag-apil sa Pilipinas sa Association of Southe East Asian Nations (ASEAN) ilabi na sa kasabutan sa tinabangay ekonomikanhon niini, butyag ni Minerva Yap, hepe sa Industry Development Division sa Department of Trade and Industry (DTI) region 7.

Didto sa Ugnayan Dialog for Progress nga gipahiluna sa Presidential Communications Office (PCO) didto sa Lahug sa miaging semana, gipadayag sa DTI ang kaayuhan nga ikatanyag sa ASEAN ilabi na ngadto sa ekonomiya sa nasud.

Ang Pilipinas giila na nga maoy sentro sa BPO, dungan usab sa pag-ila sa Thailand isip sentro sa automotive industry; sa Vietnam isip sentro sa manufacturing ug sa Singapore isip sentro sa serbisyong pinansyal, tumbok ni Yap, kinsa gipapatin-aw sa epekyo sa ekonomiya sa ASEAN sulod sa 30 minutos lamang.

Matud ni Yap, bisan sa usa ka haligi na lamang sa AEC: ang haligi sa nag-usa nga merkado ug base sa produksyon, ang AEC nagpabukas sa libre nga dagayday sa mga produkto ug serbisyo, pagsulod sa pamuhunan ug capital, ug ang pagsulod nga mas hanas nga mga trabahante.

May kasabutan ang mga nasud sa ASEAN kabahin sa trade in goods, ASEAN Framework Agreement on Services, ASEAN Comprehensive Investment Agreement alang sa pamuhunan, ASEAN financial Integration alang sa pagsulod sa capital, ug ASEAN Agreement on Movement of Natural persons alang sa skilled labor.

Dala niini, wala nay magpugong tungod kay nakunhuran na o gilibkas na ang mga gabayan nga nagpugong sa pagsulod sa pagbayloay og patigayun og serbisyo nga nagsukad sa mga nasud sa ASEAN, lakip na ang pagpatukod og mga sanga nga negosyo sa mga silingang nasud.

Pinaagi sa ASEAN, aduna nay hiniusang paagi sa pag-ila sa mga kwalipikasyon sa kapasidad sa mamumuo subay sa mutual recognition arrangements (MRA) dala sa nahiusang batakan sa kasagarang propesyon, bungat ni Yap sa DTI.

Ang resulta niini, mas lapad nga kasudlan sa trabaho alang sa kwalipekadong propesyonal sa bisan asa nga nasud sakop sa ASEAN.

Niini, gipalubad ni Yap nga nabukas usab ang mas lapad nga kapilian sa mga trabahante ug mamahimo nga kon ang nasud dili magpataas sa insentibo alang sa BPO, mahimong kini nga tsansa masakmit sa ngadto sa mas competitive.

Hinuon, gipasabut usab sa DTI nga niini, mas mapalisud ang kompetisyon kon dili maningkamot ang nasud nga makasakay sa dagan sa patigayun, tungod kay mas daghan ang mga kapiliang trabaho ug imported nga produkto nga makasulod-gawas sa nasud. (rahc/PIA-7/Bohol)

Pilipinas isip BPO hub sa Asya maoy usa sa mga dan-ag nga paglaum sa sanud tungod sa lig-on na nga imprastraktura, kamaayo sa English isip ikaduhang pinulungan ug ug katakus sa Pinoy sa outsourcing, matud sa DTI pinaagi ni Minerva Yap. (rahc/PIA-7/Bohol)