ECC kadangpan sa empleyado

nga gibalibaran sa GSIS, SSS

TAGBILARAN CITY, June 19, (PIA)--Adunay pay laing kadangpan ang mga trabahante ug empleyado nga mihangyo og benepisyo dala sa pagka-angol, pagkasakit ug pagkamatay , apan gibalibaran na sa ilang tighatag sa insurance. 

Kini maoy gipadayag sa Department of Labor and Employment Employee's Compensation Commission (ECC) pinaagi ni Regional Executive Director Atty. Jonathan Villasoto. 

Hinuon, gipasabut sa ECC nga ang aksidente, pagka-angul ug pagkamatay, nahitabo samtang ang trabahante naaisidente dala sa pagpatuman sa ilang gimbuhaton nga gipanumpaan. 

Didto sa Kapihan sa PIA, gipasabut ni Atty. Villasoto nga kon mahi-agum sa pagkasakit, disgrasya nga maka-angol ug midangat sa kamatayon sa empleyado ug trabahante, aduna lamay 3 ka tuig siya nga moduso sa iyang claim alang sa employee compensation, aron mahatagan og gamay nga hinabang. 

Samtang nagdepende ang kadak-on sa sa hinabang sa sweldo nga gidawat sa empleyado, ang hinabang alang sa funeral benefits nga gitala sa balaod, naa na sa P20,000, nga ihatag sa Government Service Insurance System alang sa magpubliko nga empleyado ug sa Social Security System alang sa trabahante sa pribadong sektor.

Apan, usahay, ang SSS o ang GSIS magdumili sa paghatag sa hinabang o employees compensation, sa daghan nilang mga rason. 

Niini nga higayon, ang ECC makatabang sa trabahante o empleyado sa pagpugos sa SSS ug sa GSIS sa paghatag sa benepisyo sa kasidente, pagkasakit o kamatayon nga gihikaw. 

Ang ECC, miangkon usab nga dili daghang tawo ang nasayud nga adunay serbisyo nga gitanyag ang DOLE subay niini. 

Ug aron sa pagpakatap sa kasayuran kabahin niini, ang ECC kauban sa DOLE maghimo og usa ka forum didto sa MetroCenter, Hunyo 20 gikan sa alas 8:00 nagdto sa alas 5:00 sa hapon adto sa MetroCenter Hotel. 

200 lamang ka tawo ang mahimong makatambong sa maong forum, mao nga kadtong interesadong masayud sa serbisyo sa ECC, giaghat nga motambong. (rahc/PIA-7/Bohol)

Si ECC Atty Jonathan Villasoto nangahat na sa mga Bol-anon nga motambong sa ilang forum pagpadayag sa Employees Compensation Commission Program Advocacy dinhi sa  Bohol adto sa MetroCenter Hotle, Hunyo 20,alas 8 nagdto sa alas 5 sa hapon. (rahc/PIA-7/Bohol)