CHR, nagpagawas og infographic

nga nagpasabot sa ilang katungdanan

TAGBILARAN CITY, July 3--Gitataw sa Commission on Human Rights (CHR) ang ginahimo nilang katungdanan sa gobyerno.

Nikatap karon sa social media ang infographic nga gipagawas sa CHR nga nagpasabot sa mandato niini isip ‘konsensiya sa gobyerno.’

Gipasabot sa CHR nga katungdanan nilang panalipdan ang tawhanong katungod sa katawhan gikan sa pang-abuso sa estado, sama sa gobyerno, polisya ug militar.

Matud pa sa komisyon, giseguro nilang wala’y pang-abuso o pagpanglapas sa tawhanong katungod sa parte sa gobyerno ug gi-protektahan sa gobyerno ang katungod sa tanang katawhan.

Pagpasabot pa sa CHR, Philippine National Police (PNP) ang gitahasang mogunit sa mga krimen sa mga tawo nga dili opisyal sa gobyerno ug mosulbad niiini.

Matud pa ni CHR Commissioner Roberto Eugenio Cadiz, wala nila gi-atake ang programang pangkalinaw ug kahusay sa gobyerno ug bisan sa paggukod sa mga sindikato sa ilegal nga droga.

Gipasabot ni Cadiz nga ang gi-kontra nila mao ang pagpamubo sa proseso, sama sa pagpatay sa mga akusado nga napatay sa giyera kontra droga.

Ang CHR namugna ubos sa Article 13, Section 17 sa Batakang Balaod 1987. Nakalatid usab ang gahom niini ubos sa Section 18. (ecb/PIA7-Bohol)

===============

P2.2-B pondo, igahin sa gobyerno

sa modernisasyon sa PUV

TAGBILARAN CITY, July 3--Aprubado na ang P80,000 subsidiya nga igahin sa 28,000 ka jeepneys ubos sa public utility vehicle (PUV) modernization program sa gobyerno.

Kini ang gikumpirmar ni Land Transportation and Franchising Regulatory Board (LTFRB) board member Aileen Lizada human gi-aprobahan sa Department of Budget and Management (DBM) ug Department of Finance (DOF) ang subsidiya sa 28,347 ka public utility jeepneys sa tibuok nasod alang sa tuig 2018.

Matud pa ni Lizada, mokabat sa P2.2 bilyon ang kinatibuk-ang kantidad sa pondo ug dili na usab angay ma-problema ang mga driver alang sa ilang equity.

Mohatag og subsidiya ang gobyerno sa 250 ka jeepneys sa 3 ka pilot areas: Senate-Philippine International Conference Center Area, Taguig-Pateros ug Pateros-Fort Bonifacio karong tuig.

Kahinumdomang gilusad sa Department of Transportation (DOTr) ang maong programa alang sa modernisasyon sa mga sakyanan sa nasod ug mas masiguro ang kahilwasan sa mga pasahero. (ecb/PIA7-Bohol)

================

PNP, nipasidaan batok sa ‘ransomware’

TAGBILARAN CITY, July 3--Nipasidaan ang Philippine National Police (PNP) Anti-Cybercrime Group (ACG) sa publiko nga likayang magpataka og abri og mga files ug kadudahang website links aron dili mabiktima sa nikatap karon nga ‘ransomware’.

Matud pa ni Sr. Supt. Michael Angelo Zuñiga, hepe sa ACG operations division, samtang wala pa hingpit nga naresolba ang bag-ong cyber-attack, angay lamang nga mag-amping na lang ang mga tiggamit og internet.

Nagsugod ang giingong pagkatap sa ransomware sa mga email ug internet links nga gipadala sa mga internet users.

Kahinumdoman nga nakasulod ang maong “ransomware” sa pipila ka mga dagkong establisimi­yento ug negosyo sa ­Europa. (ecb/PIA7-Bohol)