“Task Force Bangon Marawi,” 

gimugna na ni Duterte

MANILA, July 4--Gilagdaan na ni Presidente Rodrigo Duterte ug gigonitan na karon ni National Defense Kalihim Delfin Lorenzana ang Administrative Order Number 3 nga nagmugna og inter- agency task force aron makabangon na ang syudad sa Marawi taliwala sa nahitabong giyera tali sa tropa sa gobyerno ug teroristang grupo nga Maute.

Sa Mindanao Hour sa Malacañang kagahapon, miingon si Lorenzana nga siya ang magsilbing chairperson sa gimugnang task force nga tawgon’g Task Force Bangon Marawi.

Gipasabot ni Lorenzana nga isip pangulo usab sa National Disaster Risk Reduction and Management Council (NDRRMC), gamiton niya ang ahensiya isip behikulo sa himuong rehabilitasyon tungod kay mahimong ikonsiderar ang nahitabo sa Marawi isip disaster.

Kalabot niini, gipahayag sa Kalihim nga i-andam nila dayon ang mga kinahanglanong mekanismo alang sa rehabilitasyon sa nagubang syudad ug kini inig kahuman dayon sa nahitabong giyera didto.

Giseguro ni Lorenzana nga dili mapolitika ang gitakdang pagbangon sa maong syudad sa pag-ingon nga wala man siya’y ambisyong politikal. (ecb/PIA7-Bohol)

==============

Martial law sa Mindanao,

gipalig-on sa SC

MANILA, July 4--Gipalig-on sa Korte Suprema ang deklarasyon og martial law ni Presidente Rodrigo Duterte sa tibuok Mindanao.

Sa botong 11-3-1, gidapigan sa taas nga hukom ang pagdeklarar ni Duterte sa balaod-militar human sa pagpanghasi sa Maute terror group sa syudad sa Marawi.

Sa desisyon sa SC, 11 ang niingon nga legal ang pagkadeklarar og martial law sa tibuok Mindanao.

Tulo sa mga mahistrado ang mibotar aron paboran ang petisyon partially ug giingong angay limitado lamang sa syudad sa Marawi ang deklarasyon apil na niini sila Chief Justice Ma. Lourdes Sereno, Senior Associate Justice Antonio Carpio ug Associate Justice Benjamin Caguioa.

Samtang si Associate Justice Marvic Leonen lamang ang nag-inusarang dissenter o wala mo-uyon sa Martial Law proclamation.

Tanan sa 15 ka mahistrado adunay gidusong kaugalingong opinyon sa ilang desisyon nga gitakdang ipagawas sa Korte Suprema ugma.

Apil sa mga niduso sa petisyon batok sa Martial Law mao sila Albay Representative Edcel Lagman; mga militanteng grupo nga BAYAN, Gabriela, ACT Partylist ug Kabataan Partylist ug upat ka residente sa syudad sa Marawi.

Gideklarar ni Duterte ang martial law samtang naa kini sa opsiyal nga pagbisita sa Russia apan mibalik dayon sa nasod aron tutokan ang kagubot. (ecb/PIA7-Bohol)

==============

OEC, alisdan og 

libreng OFW ID 

TAGBILARAN CITY, July 4--Ipatuman sa Department of Labor and Employment (DOLE) ang programang I-DOLE o overseas Filipino workers (OFWs) ID isip hulip sa Overseas Employment Certificate (OEC) sa katapusan ning buwan.

Matud pa ni DOLE Kalihim Silvestre Bello III, hatagan sa DOLE ang mga Filipino migrant workers og libreng OFW ID ug dili na kinahanglan pang mag-apply og OEC kun mahatagan ang OFW og ID sa ahensya tungod kay kini man ang iilis niini.

Matud pa sa Kalihim nga useless document lang ang OEC gawas sa mokita lang ang gobyerno niini.

Mahimong ma-claim ang OFW IDs sa Philippine Overseas Employment Administration (POEA).

Gipaabot nga ilusad sa buhatan ang I-DOLE program sa tunga-tunga ning buwan ug mapatuman na ang pagpagamit sa OFW ID sa katapusan sa Hulyo.

Pinaagi niini, gipaabot nga mas mapadali na ang mga prosesong agian sa mga OFW sa dili pa sila moadto sa laing nasod aron manginabuhi. (ecb/PIA7-Bohol)