Krimen sa Bohol misaka, 

"non-index" naka-angin 

TAGBILARAN CITY, July 5, (PIA)--Adunay namatikdan nga pagsaka sa kriminalidad sa Bohol, apan segun pa sa mga kapolisan, ang pagsaka didto mamatikdi sa mga krimen nga non-index crimes. 

Didto sa Provincial Peace and Order Council (PPOC) meeting sa miaging semana, gitaho sa Kampo Dagohoy nga napakanaug sa kapolisan ang mga salaud nga silotan sa Revised Penal Code, o mas nailhang Index crimes. 

Gikan sa 219 ka index crimes nga natala sa miaging buwan, 212 na lang ang nakaabut sa mga blotter sa kapolisan sa tibuok Bohol, butyag ni PSupt Lorenzo Batuan, atul sa tigum nga gitambongan sa mga sakop sa konseho alang sa kalinaw sa Bohol.

Si Supt Batuan, kinsa hepe sa Police Community Relations sa Kampo Dagohoy mipadayag nga sa napakubos nga 7 ka kaso, naa sa 3.20% ang natala nga pag-us-os sa krime ilawom sa index crimes. 

Dugang niini, sa nagpadayong paglutos sa kapolisan sa ilegal nga drugas ug mga salaud nga gibuhatan og espesyal nga balaod, 134 ka kaso ang nadugang sa natala sa buwan sa Mayo kon itandi sa Hunyo. 

Kini dugang sa Kampo Dagohoy, naa sa 33.33& nga pagtaas kon itandi sa mga krimen sa buwan sa Mayo. 

Kon daghan ang na-alarma sa pagtaas sa kaso, gipasabut na sa kapolisan nga ang pagtaas sa non-index crimes usa ka timailhan nga ang kapolisan wala na maglumlom lamang sa mga estasyonan. 

Kini tungod kay ang pagsaka sa non-index crimes timailhan nga ang kapolisan naghimo sa pro-active measures aron gukdon kadtong nagpayuhot sa ilegal nga drugas. 

Segun usab sa taho sa kapolisan, bisan sa index crimes, daku ang natala nga mga kaso sa physical injuries, nga mahimong nagtug-an nga may mga aksidente sa kadalanan nga nagdaghan na karon ang naapil sa kwenta. 

Kinatibuk-ang 127 ka kaso nga index og non index ang nadugang sa natala sa Mayo, o 748 ang natala sa buwan sa Hunyo kon itandi sa 621 nga natala sa buwan sa Mayo. 

Kini, 20.25% nga namatikdang pagtaas sa kaso sa krimen sa katapusang duha ka buwan. 

Gan, dugang sa Kampo Dagohoy, nga bisan sa napataas nga kaso, sa 748 ka kaso sa Hunyo, 451 ka kaso niini ang gikataho sa kapolisan nga nasolbad na. 

Kini labaw lamang og 5% sa Crime Solution Efficiency sa buwan sa Mayo nga nitala lamang sa 55%, segun sa Kampo Dagohoy. (rahc/PIA-7/Bohol)

Si PSupt Lorenzo Batuan, kinsa mipadayag sa sitwasyon sa kriminalidad sa Bohol sa buwan sa Hulyo mibutyag nga may namatikdan nga pagtaas sa krime, apan kini didto sa mga non-index nga matag sa krimen. (rahc/PIABohol file photo)