P30M nga ilegal nga druga 

nasakmit sa tulo ka buwan

TAGBILARAN CITY, July 5, (PIA)--Mikapin pa sa P 39 milyones ang balor sa ilegal nga drugas nga nasakmit sa mga tinugyanan sa Bohol sa milabay nga tulo ka buwan.

Sa hiniusang taho sa kapolisan ug sa mga tinugyanan nga nanguna sa kampanya batok sa ilegal nga patigayun sa drugas, napakita nga gikan sa Abril hangtud sa Hulyo 27 ning tuiga, P39, 323, 854.00 ang kinatibuk-ang balor sa ilegal nga drugas nga nasakmit sa mga tinugyanan sa kagamhanan. 

Kini segun pa sa dangerous Drugs Board nga bili, pasabut sa Kampo Dagohoy atul sa Provincial Peace and Order Council (PPOC) Meeting niadtong miaging semana. 

Segun sa taho, sa milabay nga tulo ka buwan, human sa 81 ka mga operasyo nga gipangunahan sa drug teams sa kapolisan, sa Philippine Drug Enforcement Agency, sa Criminal investigation Detection Group ug sa National Bureau of Investigation, nasakmit sulod sa tulo ka buwan ang 3 ka kilo ug 332 gramos nga shabu. 

Ug sa 88 ka adlaw, 100 ka tawo ang nadakpan sa mga tinugyanan samtang mokabat sa 156 na ka kaso ang napasaka subay sa salaud sa patigayun ug paghupot sa ilegal nga drugas, butyag ni PSupt Lorenzo Batuan. 

Si Supt Batuan, kinsa maoy hepe sa Police Community Relations sa Kampo Dagohoy mipakita usab nga labing dako nga suhot sa mga tinugyanan ang tulo ka kilo nga shabu nga nasakmit sa mga tinugyanan. 

Sa nagpadayon nga kampanya, mikabat sa 38,797 na ka drug user ug pusher ang mitahan sa mga tinugyanan samtang 24 na ang napatay kay misukol sa mga kapolisan, padayag sa Kampo Dagohoy. 

Dungan niini, padayon pa gihapon ang mga tinugyanan sa Bohol nga silhigan ang mga barangay nga apektado sa ilegal nga drugas. 

Kini subay sa programa sa Presidente nga wad-on na ang suliran sa ilegal nga drugas nga maoy naka-angin sa mga kaugma-on sa mga Pilipino. (rahc/PIA-7/Bohol)

Kay wa moundang, nadakpan ra gyud. Human sa usa ka tuig nga hugot nga kampanya batok sa ilegal nga drugas, nagdagway'g may paglurang na ba sa mga na-ungo? (PIABohol/PNPBohol)