P333-M budget gikan sa nasudnong kagamhanan, 

gitakdang ipang apod-apod sa 22 ka LGUs sa Bohol

BOHOL, July 5--Mokabat sa P333 milyon nga budget gikan sa nasudnong kagamhanan ang gitakdang ipang apod-apod sa 22 ka local government units (LGU) ning lalawigan sa Bohol sa tumong nga mapalambo ang nagkalain-laing imprastraktura sa kalungsoran.

Ang maong budget ipaagi sa nasudnong kagamhanan sa Department of Interior and Local Government (DILG).

Matud pa ni Jocelyn Bandala, ang local government operations sa Bohol nga ang matag LGUs gahinan og P10.5 ngadto sa P24.3 milyon pinaagi sa programang Assistance to Disadvantaged Municipalities (ADM) sa DILG nga amgid sa bottom-up budgeting (BUB) apan magkalahi lang ang proseso.

Ang mga lungsod nga makadawat sa maong ADM budget mao ang mga lungsod sa Alburquerque, Alicia, Batuan, Calape, Carmen, Clarin, Corella, Dagohoy, Danao, Dauis, Duero, Garcia Hernandez, Inabanga, Lila, Loon, Mabini, Maribojoc, Sierra Bullones, Talibon, Tubigon, Ubay ug Valencia.

Matud pa ni Bandala nga ang mga proyektong nahisulod sa ADM naglakip sa access roads, potable water, evacuation centers ug gagmay nga mga water impounding.

Ang alokasyon ihatag ngadto sa kalungsoran human kini makadawat og award sa Seal of Good Financial Housekeeping agi og pagsubay sa direktiba sa Department of Budget and Management (DBM).

Base sa talaan sa DILG, P690.83 milyon na ang gigahin alang sa implementasyon sa maong programa sa Central Visayas nga maglakip sa 45 ka LGUs sa rehiyon.

Ang ADM namugna isip “catch-up mechanism” nga mo-abag sa mga LGUs aron patas-an ang akses sa mga lungsoranon ug abibahan ang partisipasyon sa civil society organizations sa local governance.

Ang ADM program direkta usab nga misuporta sa Philippine Development Plan (PDP) alang sa tuig 2017 ngadto sa 2022. (ecb/PIA7-Bohol)