Maritime transport agreement,

gilagdaan sa PH ug Germany

MANILA, July 5--Usa ka Letter of Intent ang gilagdaan kagahapon tali sa Department of Transportation (DOTr) ug sa German Federal Ministry of Transport and Digital Infrastructure nga tuyong palig-onon ang maayong relasyon sa Pilipinas ug sa Germany.

Nahisulod sa maong kasabotan ang pagpakusog sa martime transportation diin magmugna kini og mga programa nga tuyong mas mapaayo ang sitwasyon sa mga pantalan.

Kauban usab dinhi ang pagpakusog sa mga maritime equipment sa Pilipinas ug 

ang pagtinabangay sa duha ka nasod sa hisgotanan sa negosyo pinaagi sa maritime transport.

Parte usab niini ang pagpahigayon og mga research training ug staff development sa sektor sa Maritime Industry.

Niadtong Marso, nakigpulong sa pipila ka negosyante sa Germany si DOTr Kalihim Arthur Tugade aron mokuha og mga ideya ug mangdapit og foreign investors aron mapaayo ang sistema sa transportasyon ug traffic management scheme sa Pilipinas.

Usa ang Germany sa mga nasud sa tibuok kalibotan nga may malambuon nga sistema sa public transportation.

Human sa nahimong paglagdaay kagahapon, subling nipahigayon og bilateral meeting ang mga opsiyal sa DOTr ug mga delegado sa ministry of transportation sa Germany, alang sa uban pang mga detalye sa mga proyekto ug programang pagamugnaon sa duha ka nasod. (ecb/PIA7-Bohol)