Binuwan’g anti-drug meetings sa mga brgy.

sa syudad sa Tagbilaran, gimando sa DILG

TAGBILARAN CITY, July 7--Ang Department of Interior and Local Government (DILG) sa syudad sa Tagbilaran hingpit nga nag-monitor sa Barangay Anti-Drug Abuse Councils (BADAC) sa tinguhang mapadayon ang kampanya batok sa ilegal nga droga sa mga barangay.

Si Tagbilaran City DILG Officer Mardonio Roxas nagkanayon nga ang BADAC gimanduan sa pagpahigayon og binuwan nga meetings aron e-assess ang progreso ug matino ang mga kalisod nga gi-atubang sa kampanya batok sa ilegal nga droga 

Matud pa nga tuyo niining mga meetings sa pagtoki sa mga problema ug kalamboan lakabot sa ilegal nga droga.

Ang DILG gitahasan sa pag-monitor sa mga opisyal sa ilang paningkamot sa pagpatuman sa kampanya ni Presidente Rodrigo Duterte batok sa ilegal nga droga.

Matud pa ni Roxas nga ang papel sa departmento niining kampanya mao ang pagduso sa pagpasaka sa gidaghanon sa drug-free barangays.

Sa pagkakaron, wala pa’y barangay sa syudad sa Tagbilaran ang nadeklarar nga drug-free sulod sa labaw sa usa ka tuig sukad gilusad ni Duterte ang kampanya batok sa ilegal nga droga. (ecb/PIA7-Bohol)