BOHECO II makasuga kon 

masulod ang Cebu supply 

TAGBILARAN CITY, July 10, (PIA)--Hangtud nga dili makasulod ang supply sa koryente nga magagikan sa Cebu-Negros-Panay Grid (Cebu Supply) dinhi sa Bohol, hanap ang posibilidad nga makasuga ang mga konsumidor nga giserbisyohan sa Bohol Electric Cooperative II (BOHECO II). 

Kini maoy update nga gipahayag ni City Councilor Eliezer Borja, kinsa chairman sa City Council on Protective Services ug may usa sa mga tinugyanans a syudad nga nakigtigum sa mga tinugyanan usab sa utilities ug tig supply niini. 

Tungod sa kalayo sa kutay nga daganan aron serbisyohan unta sa koryente nga makaingon sa generation loss, mas daghang koryente ang masayang mao nga ang mga konsumidor sa BOHECO II, adto na lang mosalig kon makasulod na ang supply gikan sa Cebu-Negros-Panay grid, dugnag ni City Administrator Leonides Borja. 

Kini samtang napulo ug duha ka megawatts nga gahum dagitab ang gipaambit sa Bohol Dampas Diesel Power Plant (BDDPP) aron makapasiga ang Tagbilaran ug pipila ka kalungsuran nga nalakip sa service area sa Bohol Electric Cooperative 1 (BOHECO 1).

Ang napulo ka megawatts niini maoy gipulipuli og rasyon sa mga feeders sa mga distrito sa Tagbilaran diin nasentro ang mga negosyo ug mga buhatan sa kagamhanan, matud ni Kosehal Borja. 

Ang laing duha ka megawatts, gipaambit sa BDDPP ngadto sa BOHECO 1 aron kapun-an ang kasamtangan nga panginahanglan niini nga makahimo sa pagrasyon usab sa koryente sa ilang service areas. 

Ang BOHECO 1 naggamit usab sa koryente nga gisupply sa Hanopol Hydro Power Plant ug sa Ewon Sevilla Hydro Power Plant, apan kini kuwang ra nga irasyon sa mga service areas sa BOHECO 1. 

Kahinumduman nga usa ka magnitude 6.5 nga linug ang mi-igo sa Leyte nakabalda sa pipila ka mga plantang geothermal nga maoy gisaligan sa Bohol sa iyang dakung panginahanglan sa koryente. 

Matud ni Betty Martinez, corporate spokesperson sa National Grid Corporation of the Philippines (NGCP) kinsa maoy nagdumala sa pagpakatay sa koryente gikan sa tinubdan sa mga geothermal plants, mi-abot sa kapin sa 76 ka megawatts ang nagamit sa Bohol niadtong Mayo. 

Apan human sa linug, kining tanan nahanaw tungod kay ang sistema sa pagpanalipud sa mga planta automatic nga mishutdown niini aron malikayan ang mas grabe nga kadaut. 

Nasayran usab nga samtang gihimo-ag assessment ang mga planta, may mga kadaut nga namatikdan ug ang labing dako niini tua didto sa marshalling station nga tapokan sa mga koryente aron ipakatay sa linya paingon sa Bohol. 

Niini, walay koryente nga nakalagbas ug mihabol sa Bohol ang kangitngit nga nasinati na usab human mangadaut ang mga linya sa NGCP sa bagyong Yolanda niadtong 2013. 

Tungod niini, napugos ang mga opisyales sa Energy Regulatory Commission (ERC), uban sa hangyo sa mga power utilities ug opisyales nga gamiton pagbalik ang BDDPP, nga gipanag-iya na sa Salcon Power Corporation Incorporated (SPCI). 

Sa 16 megawatts nga rated capacity sa BDDPP, 12 lamang ang gi-arya nga supply sa koryente, samtang gireserba ang 4 ka megawatts sa pagpangandam sa dugang pang emerhensya, padayag ni Borja atul sa hiniusang tigum sa City Peace and Order Council, City Drug Abuse Council ug sa City Disaster Risk reduction and management Council didto sa JJs Seafoods Hulyo 10. (rahc/PIA-7/Bohol)

Lunes na, wala pa. Gisaad na sa mga opisyales nga makakoryente na ang Bohol sa Lunes, apan tungod sa nalangan nga testing sa Ormoc substantion, wala kini matuman. Ang pagpasulod sa koryente gikan sa Cebu-Negro-Panay Grid nga gipaagi sa Ormoc maoy bugtong paglaum sa BOHECO II nga mga konsumidor nga makapasiga sa ilang suga, matud ni Konsehal Eliezer Borja. (rahc/PIA-7/Bohol)