Malakanyang, nanawagan sa publiko

nga suportahan ang ‘E-Power Mo’

MANILA, July 13--Nanawagan ang Malakanyang sa publiko nga makighiusa aron magmalampuson ang programang ‘E-Power Mo’ ni Presidente Rodrigo Duterte kalabot sa saktong paggamit sa enerhiya.

Atol sa paglusad sa ‘E-Power Mo’ ug pagtambong sa Energy Consumers and Stakeholders Conference sa PICC kagahapon, miingon si Presidential Communications Operations Office (PCOO) Kalihim Martin Andanar nga nahisulod sa ‘E-Power Mo’ program ni Presidente Duterte ang mga kinahanglang kabag-ohan sa mga tinubdan sa enerhiya ug paggamit niini nga angay tabangan sa tanan.

Matud pa ni Andanar nga base sa panlantaw ni Presidente Duterte, angay ma-secure ug ma-conserve ang paggamit og power o enerhiya pinaagi sa E-Power Mo program.

Gipahayag usab ni Department of Energy (DOE) Kalihim Alfonso Cusi nga ang maong programa parte sa gisaad ni Presidente Duterte nga kabag-ohan ug pagpalambo sa ekonomiya sa nasod nga mabati sa matag katawhang Pilipino. (ecb/PIA7-Bohol)

===============

Suplay sa kuryente sa Leyte, Samar 

ug Bohol, sa Agosto pa mabalik

TAGBILARAN CITY, July 13--Wala pa nabalik ang suplay sa kuryente sa tulo ka lalawigan sa Visayas base sa naunang estimated date of restoration kagahapon, Hulyo 12.

Matud pa sa Department of Energy (DOE), daghang nagubang transformers tungod sa kusog nga linog nga nahitabo niadtong niaging semana.

Tungod niini, sa Hulyo 31 o Agosto 1 na ang gipaabot nga pagbalik sa enerhiya nga maka-supply sa kuryente sa Leyte, Samar ug Bohol.

Apan naa sa 160 megawatts lamang ang mapabalik nga enerhiya sa maong petsa nga 55% lang sa total demand alang sa tulo ka lalawigan.

Plano na usab sa National Grid Corporation of the Philippines (NGCP) nga mogamit og submarine cable aron madala ang kuryente gikan sa Cebu paingon sa Ormoc ug sa Kananga Leyte.

Matud pa sa NGCP nga sa unom ka transformers nga naguba tungod sa linog, usa pa lamang ang nigana.

Giseguro sa NGCP nga padayon ang 24/7 nilang pagtrabaho bisan dili maayo ang panahon sa lugar. (ecb/PIA7-Bohol)