NGCP nakasupply nag koryente

i-testing sa Kananga geoplants

TAGBILARAN CITY, July 13, (PIA)--Nagmalampuson ra gayud ang National Grid Corporation of the Philippines (NGCP) sa pagpakatay sa 230 KiloVolts nga supply sa koryente balik ngadto sa mga planta sa Kananga niadtong Miyerkoles sa gabii sa alas 8:17.

Ang koryente nga gisupply sa NGCP nagdto sa EDC gamiton sa pagpa-andar sa turbina sa mga planta sa Upper Mahiao ug ug Malitbog geothermal plants sa Northern Leyte aron ilhon ang mga daut niini.

Gawas pa, ang backfeed power, magamit sa EDC sa paghimo sa pagtesting sa ilang mga planta aron suta-on haing dapita ang mga apektado sa linug.

Gipasabut ni NGCP Corporate Spokesperson Atty Cynthia Alabanza nga ang mga planta, susama ra usab sa mga aplliances, dili mahibaw-an kon hain ang guba kon dili isaksak sa koryente.

Kahinumduman nga una na nga gipasudlag koryente sa NGCP ang mga plata sa EDCniadtong nianging gabii, apan gipaundang lang usab sa EDC tungod kay may nakita silang suliran sa planta.

Una na nga gikataho nga mahimong may 40MW pa nga koryente nga mapuga sa mga plantang apektado sa linug sa Leyte niadtong Hulyo 6.

Ang Kananga geothermal Plants giapilan sa 232.5 MW nga Malitbog, Mhanagdong A ug B nga may 180 MW, ug 125 MW nga Upper Mahiao, nga maoy kanhi nagsupply sa koryente sa Samar, Leyte ug Bohol, direktang apektado sa linug.

Tungod niini, nangita nag laing supply ang NGCP, usa niini nga gitan-aw, mao ang sobra nga koryente gikan sa Cebu-Negros-Panay grid.

Sa nagpadayong testing sa EDC, kon makit-an na ang guba, mahimo-an na usab kini og paagi nga ikapahiuli aron makapagawas nag tinubdan samtang gitrabaho pa usab ang ubang planta niini, segun sa NGCP update nga gipadala ni Betty Martinez.

Dungan niini, nahuman na usab ang pagtesting sa 150MVA Transformer No. 6 sa Ormoc Substation samtang padayon na nga gipulihan ang nadaut nga bushing niini.

Buot sa NGCP nga suplayan sa koryente ang nadaut apan napulihan nag bushing nga transformer aron ilhon kon wala na ba kiniy laing daut.

Kini usab samtang nagpadayon pa ang pagtesting alang sa leakage reactance sa lima pa ka transformer sa Ormoc Substation nga nangadaut.

Ang Transformer No 6 usa ka step down transformer nga mopaconvert sa 230KV nga koryente nga gipaagi sa submarine cable gikan sa Sugbo ngadto sa 138 KV aron mapadagan sa NGCP ngadto na sa mga Distribution Utilities sa tulo ka isla nga gikutayan sa koryente: Samar, Leyte ug Bohol.

Bisan pa usab niini, gisugdan na sa NGCP ang pagempake ug pagbalhin sa 150 ug 100 MVA transformers gikan sa Compostela Substation sa Cebu ngadtos Ormoc Substation.

Kini maoy ipuli sa mga transformers nga nangaguba sa linug.

Gani, gisugdan na usab sa NGCP ang pag reconfigure sa Compostela-Daanbantayan-Tabango-Ormoc 230kV line aron modawat lang kini sa 138kV sugod gahapon sa alas 4:00PM Julyo 12.

Kon matibawas na ang reconfiguration, mahimo na sa NGCP sa pagdeliver sa koryente subay sa 138 KV nga linya gikan sa Cebu ngadto sa Ormoc ug dili na kinahanglan pag-istep down alang sa mas dali nga kasaligang supply. (rahc/PIA-7/Bohol)