Implementasyon sa nationwide 

smoking ban sa Hulyo 22 na 

MANILA, July 14--Gitataw sa Department of Health (DOH) nga sa Hulyo 22 na ang implementasyon sa nationwide smoking ban.

Matud pa ni DOH Kalihim Paulyn Jean Ubial nga gitugyan nila sa gimugnang task force sa matag lungsod ug barangay ang pag-aresto sa dili mosunod sa balaod.

Kun walay ordinansang ginapatuman ang usa ka lugar, ang multang nakalatid sa Executive Order ang ipatuman.

Pananglit niini nga kun naaresto ang usa ka indibidwal nga nanigarilyo sa dili designated area, ila kining arestuhon.

Gipahinumdom usab ni Ubial sa mga local government units (LGU) ang pagmugna og mga task force nga maoy magpatuman sa maong balaod.

Makatabang usab sa smoke free task force ang mga polis sa pagpanakop sa mga manigarilyo sa mga pampublikong lugar.

Ubos sa EO, gibawal ang pagpanigarilyo sa tanang pampublikong lugar.

Ang mga establisimiento gimanduang magbutang og smoking area gawas lamang sa mga ospital ug susamang establisimiyento sama sa health centers, eskwelahan, hagdanan, elevator, mga lugar nga may fire hazzard sama sa gasolinahan ug mga lugar diin gi-andam ang mga pagkaon tungod kay absolute no smoking area kining mga lugara.

Samtang gipasalig usab sa kalihim nga mahuman nila ang dugang Implementing Rules and Regulations (IRR) sa maong EO.

Nipasidaan usab kini nga sakop sa maong EO ang paggamit og electronic cigarette o vape. (ecb/PIA7-Bohol)