National ID system, suportado

pa gihapon sa Malakanyang

MANILA, July 14--Subling nipahayag ang Malakanyang og pagsuporta sa pagpatuman sa national identification (ID) card system sa nasod.

Dungan niini, gitataw usab ni Presidential Spokesperson Ernesto Abella nga ang planong Muslim ID scheme usa lamang ka lokal nga inisyatibo.

Matud pa ni Abella nga sama sa giingon ni Philippine National Police (PNP) chief Director Gen. Ronald dela Rosa, wala naggikan sa mga mas taas nga otoridad ang ideya kalabot niini.

Niadtong niaging semana, gi-awhag man sa Central Luzon Provincial Police Office ang 200 ka Muslim leaders sa ilang rehiyon nga magpatuman og Muslim ID system.

Giingong tuyo niiining makatabang sa dokumentasyon sa mga barangay nga modawat og mga evacuees gikan sa syudad sa Marawi.

Apan dili uyon niini ang Armed Forces of the Philippines (AFP) ug ang Autonomous Region in Muslim Mindanao (ARMM) tungod kay makonsidera kining diskriminasyon.

Una nang miingon si Abella niadtong Abril nga wala nila direktang gipahayag nga wala nila gisuportahan ang Muslim ID system, apan nagtuo silang makaayo kun magbaton kita og national ID. (ecb/PIA7-Bohol)