Duterte, nakakuha og 82% approval 

rating sa Pulse Asia survey

MANILA, July 18--Si Presidente Rodrigo Roa Duterte pa gihapon ang labing gisaligan sa kadaghanan sa mga Pilipino ug aprubado sa publiko ang deklarasyon niini nga martial law base pinakabag-ong gipagawas nga Pulse Asia survey.

Sa survey sa buwan sa Hunyo sa Pulse Asia, naa sa 82 porsiyento ang approval rating ni Duterte samtang 81 porsiyento ang trust rating niini.

Mas taas kini og upat ka porsiyento gikan sa iyang rating niadtong buwan sa Marso nga 78 porsiyento.

Sa maong survey, niubos ang disapproval rating sa Presidente nga 5 porsiyento og duha ka puntos. Samtang lima ka puntos usab ang gisaka sa 81% nga trust rating sa Presidente gikan sa rating niini niadtong Marso nga 76 porsiyento.

Gihimo ang survey usa ka buwan human ideklarar sa Presidente ang balaod militar sa Mindanao tungod sa nahitabong giyera sa syudad sa Marawi.

Nakakuha usab sa maong survey og majority approval scores sila Bise Presidente Leni Robredo ug Senate President Koko Pimentel. Nakatala si Robredo og 61% samtang si Pimentel nakakuha og 62%.

Apan ang ratings nila House Speaker Pantaleon Alvarez ug Chief Justice Ma. Lourdes Sereno parehong niubos sa 50-percent mark.

Gawas sa Marawi crisis, gihimo ang survey niadtong gi-aprobahan sa Kamara ang tax reform package sa gobyerno ug sa dihang nagkasungi ang House of Representatives ug Judicial Branch tungod sa kaso sa gitawag nga Ilocos 6. (ecb/PIA7-Bohol)

===============

Palasyo, nipasabot sa 5-month

Martial Law extension ni Duterte

MANILA, July 18--Gipasabot sa Malakanyang ang hangyo ni Presidente Rodrigo Roa Duterte sa Kongreso nga i-uswag og lima ka buwan o hangtod sa katapusan sa 2017 ang pagpatuman sa Martial Law sa tibuok Mindanao.

Matud pa ni Presidential Spokesman Ernesto Abella, tuyo sa pag-uswag sa Martial Law nga mahatagan og igong panahon ang tropa sa gobyerno aron ipadayon ang ilang operasyon ug dili maapekt0han og bisan unsang deadline.

Si Abella nagkanayon nga makatabang usab kini aron makatutok ang mga militar sa pagpabalik sa syudad sa Marawi ug alang sa ipahigayong rehabilitasyon ug pagbangon sa maong lungsod gikan sa giyera.

Dungan niini, gipahayag ni Abella nga posibleng personal nga motambong si Presidente Duterte sa special joint session sa Kongreso aron ihikyad ang iyang hangyong extension sa Martial Law sa Mindanao.

“Wala po tayong ma-e-elaborate, except that it is — it is to ensure public safety and in order to quell. So let me go back to that, the primary objective of the possible extension is to allow our forces to continue with their operation, unhampered by deadlines and to focus more on the liberation of Marawi and its rehabilitation and rebuilding,” matud pa ni Abella. (ecb/PIA7-Bohol)