DOE, padayon’g nagsusi sa kalapad

sa kadaot sa linog sa Leyte

TAGBILARAN CITY, July 7--Hingpit nga gibantayan sa Department of Energy (DOE) ang pagpabalik sa suplay sa elektrisidad human gitay-og sa magnitude 6.5 nga linog ang Visayas kagahapon sa hapon.

Nawad-an og suplay sa elektrisidad ang Leyte, Samar ug Bohol apil na usab ang Panay Island, Negros, Cebu ug uban pang parte sa Visayas nga naapektuhan usab sa maong power interruption.

Padayon ang koordinasyon sa DOE sa uban pang ahensiya aron susihon ang nahimong kadaot tungod sa maong linog.

Padayon usab nga gitino sa National Grid Corp. of the Philippines (NGCP) ang kadako sa kadaot sa mga transmission facilities niini sa Visayas.

Gi-abisohan na ni DOE Kalihim Alfonso Cusi ang mga industry players nga siguradohon ang pagsunod sa safety practices sa pagpabalik sa suplay sa elektrisidad sa mga lugar nga naapektohan sa linog.

Giseguro sa NGCP ngadto sa DOE ug sa publiko nga magpahigayon sila og aerial ug foot patrols kun masiguro nilang luwas na kining himuon.

Nihatag na og direktiba ang DOE sa mga managers sa mga energy facilities apil na ang mga power distribution utilities sa pagduso og regular nga update sa ahensiya alang sa saktong koordinasyon ug paspas nga pagpabalik sa kuryente. (ecb/PIA7-Bohol)